गोंदिया- तिरोडा तालुक्यातील किडंगीपार गावाशेजारी खाणीत बारबरीक कंपनीच्या क्रशर मशीनच्या सहाय्याने व सुरुंग लावून दगड फोडण्याचे काम सुरू आहे. त्यामुळे, अर्जुनी व किडंगीपार रस्त्याशेजारी खाजगी शेत जमिनीत दगडाची खान लागली आहे. त्याचबरोबर, दगडाला बारीक करण्याच्या प्रक्रियेदरम्यान खूप धूर निघतो. यामुळे किडंगीपार येथील नागरिकांच्या आरोग्याला धोका निर्माण झाला आहे. दगड फोडीचे काम बंद करण्यासाठी ग्रामस्थांनी जिल्हाधिकारी यांना निवेदन दिले होते. मात्र, त्याचा उपयोग न झाल्याने गावकऱ्यांनी कंपनीला बंद करण्यासाठी स्वतः कंपनीवर धडक मोर्चा काढला आहे.
गाव परिसरातील खाजगी खानीमुळे शेतकऱ्यांना त्रास सहन करावा लागत आहे. या संदर्भात येथील कंत्राटदाराला अनेक वेळा सांगण्यात आले. तरीसुद्धा कंत्राटदार, जन प्रतिनिधी गावकऱ्यांच्या सुचनांकडे दुर्लक्ष करीत आहे. तसेच, सुरुंग लावून दगड फोडताना निघणाऱ्या धुरामुळे रस्त्याने जाणाऱ्या लोकांना याचा फटका बसत आहे. रस्त्यावरुन ये-जा करणाऱ्या लोकांंना त्रास होत आहे. बारबरीक कंपनी क्रशर मशीन व खाजगी जागेमधील दगडाची खान गावापासून फक्त २०० मिटर अंतरावर आहे. यामुळे गावातील लोकांचा व जवळच्या शेतकऱ्यांचा जीव धोक्यात आला आहे.
खाणीजवळ जिल्हा परिषद लघू पाटबंधारे विभागाचा कोल्हापुरी बंधारा व रस्ता बांधलेला आहे. या रस्त्यावरून गावातील लोक ये-जा करतात. मात्र, रस्त्याची वाहन क्षमता १० ते १२ टनाची असताना या रस्त्यावरुन ४० ते ४५ टनाचे ओव्हरलोड टिप्पर रात्रंदिवस गिट्टी वाहून नेत आहे. त्यामुळे हा रस्ता पूर्णत: उखरला असून त्यात मोठमोठाले खड्डे पडले आहेत. पूल तुटन्याची शक्यता बळावली आहे. या संदर्भात जिल्हाधिकारी, तहसीलदार तसेच उपविभागीय अधिकारी यांनी वारंवार तक्रार व सुचना करण्यात आल्या. परंतु, अधिकाऱ्यांचे याकडे मुळीच लक्ष नाही. उलट गिट्टी खोदकाम व बारबरीक क्रशर कंपनी कंत्राटदाराला प्रशासनिक अधिकाऱ्यांकडून अभयदान मिळत असल्याचे दिसून येत आहे. त्यामुळे, बारबरीक कंपनीच्या कामामुळे त्रासलेल्या गावकऱ्यांनी आज तहसीलदार, थानेदार व बारबरीक कंपनीचे व्यवस्थापक यांच्या उपस्थितीत कंपनीवर धडक मोर्चा काढला. त्याचबरोबर, समस्येचे समाधान करावे अशी शासनाकडे मागणी केली.
हेही वाचा- गोंदियात पुन्हा १३ शेतकऱ्यांच्या भातपिकांच्या गंजी जाळल्या, शेतकऱ्यांवर मोठे आर्थिक संकट
