गोंदिया - जिल्ह्यातील आमगाव नगर परिषद अंतर्गत येणाऱ्या रिसामा येथील राधाकृष्ण मंदिर आहे. याच परिसरातील जोडाबोडी तलावात हजारो मासे मृत पडल्याचे आज सकाळी आढळून आले आहे. त्यामुळे मत्स्य व्यवसाय करणारे दुर्गाप्रसाद रहेकावार, भाऊलाल भवरिया यांचे लाखो रुपयांचे नुकसान झाले आहे. अचानक हजारो मासे मृत पडल्याने कुणीतरी जाणूनबुजून विषारी रसायन टाकले किंवा उष्णतेमुळे हे मासे मृत झाल्याची शक्यता नागरिकांकडून व्यक्त होत आहे.
गोंदिया जिल्हा हा तलावांचा जिल्हा म्हणून ओळखला जातो. या तलावांमुळे अनेकांना रोजगार उपलब्ध झाला आहे. अनेकांनी या तलावात मत्स्य व्यवसाय सुरू केला आहे. गोंदिया जिल्ह्यातील आमगाव नगर परिषद अंतर्गत येणाऱ्या रिसामा हे गाव आहे. येथे राधाकृष्ण मंदिर परीसरात जोडाबोडी तलाव आहे. येथील मच्छिंद्र मत्स्यपालन सहकारी संस्था आमगाव (रिसामा) या संस्थेमार्फत गेल्या अनेक वर्षांपासून हा तलाव लिलावाने भाडे तत्वावर घेत आहेत. यानंतर संस्थेकडून निविदा काढल्या जातात. ज्या ठेकेदारांना ही निविदा मिळते त्या लोक तलावात मत्स्य व्यवसाय करून आपल्या कुटुंब चालवीत असतात.
अनेक अडचणी वर मात करून ते हा मत्स्य व्यवसाय करतात. मात्र, आज सकाळी आजूबाजूला असणाऱ्यांनी काही मासे मरण पावल्या असल्याचे सांगितले. संस्थेच्या लोकांनी आल्यावर बघितले तर त्यावेळी त्यांना हजारोच्या वर मासे मृत पावल्याचे आढळले. तलावातून अंदाजे १० ते १५ क्विंटल मासे मृत पावल्यामुळे या मत्स संस्थेला लाखोंचे नुकसान झाले आहे. तसेच तलावातील पाणीसुद्धा दुषित झाले आहे.
तलावातील एकूण पाणी साठवण क्षमतेच्या १५ ते २० टक्के पाणी साठा उपलब्ध असतानाही मासे अचानक मरण पावले कसे ? तलावातील पाण्यात कुणीतरी जाणूनबुजून विषारी रसायन टाकले असावे किंवा उष्णतेमुळे मासे मृत्यू पावले असावे, असा अंदाज वर्तविला नागरिकांकडून वर्तविला जात आहे. झालेल्या नुकसानाची भरपाई मिळावी यासाठी संस्थेचे अध्यक्ष भाऊलाल भवरिया, सचिव दुर्गाप्रसाद रहेकवार व संचालक मंडळांनी मत्स्य विभागाकडे मागणी केली आहे.
