गोंदिया - आमगाव तालुक्यातील कुंभारटोली येथील चोरीच्या गुन्हात अटक केलेल्या आरोपी राजकुमार अभयकुमार धोती (30) याचा पोलीस कोठडीत मृत्यू झाला होता. हे प्रकरण सी.आय.डी.च्या ताब्यात देण्यात आले होते. शवविच्छेदन अहवालानंतर व सी.आय.डी. तपासानंतर त्या पाच पोलीस कर्मचाऱ्यांवर गुन्हा दाखल करण्यात आला. पोलीस निरीक्षकासह चार पोलीस कर्मचाऱ्यांना अटक करण्यात आली होती. सहायक पोलीस निरीक्षक महावीर जाधव हे पसार होते. अखेर त्याला मंगळवारी अटक करण्यात आले. त्याला बुधवारी न्यायालयात हजर केले असता आरोपीला एक दिवसाची पोलीस कोठडीत देण्यात आली आहे.
काय आहे प्रकरण -
सविस्तर वृत्त असे की राजकुमार अभयकुमार धोती सह सुरेश धनराज राऊत, राजकुमार गोपीचंद मरकाम व एक अल्पवयीन आरोपीला स्थानिक गुन्हे शाखेने २० मे ला अटक केली होती. व २१ मे ला स्थानिक गुन्हे शाखेने आमगाव पोलीस ठाणेला सदर आरोपींना सोपविले होते. त्यापैकी एका आरोपीचा आमगाव ठाणे पोलीस कोठडीत (२२ मे) ला सकाळी ५ वाजता राजकुमार अभयकुमार धोती संशयास्पद मृत्यू झाले होते. या प्रकरणाच्या चौकशीनंतर पोलीस अधीक्षक विश्व पानसरे यांनी प्राथमिक तपासणी करून पोलीस निरीक्षक, सहायक पोलिस निरीक्षक, व दोन पोलीस शिपाई यांना तडकाफडकी निलंबित केले होते.
सीआयडीची कारवाई -
त्यानंतर हे प्रकरण सीआयडीला सोपविण्यात आले. पोलीस कोठडी मारहाण प्रकरणातील तपासात पोलीस विभागातील पोलीस निरीक्षक सह पाच कर्मचाऱ्यांवर २७ मे रात्री ९ वाजता दाखल करण्यात आले. सदर प्रकरणात आरोपी पोलीस निरीक्षक सुभाष चौहान, सहायक पोलिस निरीक्षक महावीर जाधव, पोलीस हवालदार खेमराज खोब्रागडे, अरुण उके, दत्तातय कांबळे यांच्याविरोधात भादवी कलम ३०२, ३३०, ३४ अंतर्गत गुन्हा नोंद करून अटक करण्यात आली. यात पोलीस उपनिरीक्षक महावीर जाधव हा पसार होते. त्याला बुधवारी अटक करण्यात आली. आरोपींना न्यायालयात हजर केले असता ३ जून पर्यंत न्यायालयाने पोलीस कोठडी सुनावण्यात आली आहे.
