गडचिरोली - भामरागड तालुक्यातील कोपरशी जंगल परिसरात मंगळवारी सी-60 जवान व नक्षलवाद्यांमध्ये चकमक उडाली. सुमारे दहा ते पंधरा मिनिटे चाललेल्या चकमकीनंतर जवानांचा वाढता दबाव पाहून नक्षलवादी जंगलात पसार झाले.
या चकमकीत काही नक्षलवादी जखमी झाल्याचा अंदाज पोलीस विभागाने वर्तवला आहे. पोलीस दलाचे सी-60 जवान मंगळवारी सायंकाळच्या सुमारास भामरागड तालुक्यातील कोपरशी जंगल परिसरात नक्षलविरोधी अभियान राबवत होते. यावेळी लपून बसलेल्या नक्षलवाद्यांनी जवानांवर गोळीबार सुरू केला.
हेही वाचा - खुर्सापार परिसरात ३३ किलो चांदी जप्त; स्टॅटीस्टीक सर्व्हीलंस टीमची करवाई
प्रत्युत्तरात जवानांनी गोळीबार केल्याने नक्षलवादी घनदाट जंगलात पसार झाले. चकमकीनंतर जवानांनी घटनास्थळावर शोध मोहीम राबवली. यामध्ये चार रायफल, पिटु, क्लेअर माईन व भूसुरुंग स्फोट घडवून आणण्याचे साहित्य आढळून आले. या परिसरात नक्षल विरोधी मोहीम तीव्र करण्यात आली आहे.
