गडचिरोली - कोरोनाचा संसर्ग रोखण्यासाठी मुख्यमंत्री उद्धव ठाकरे यांनी राज्यभरात 144 कलम लावून जमावबंदी लागू केली. मात्र, गडचिरोलीत जमावबंदी आदेशाला झुगारून लोक रस्त्यावर फिरत असून शहरातील अनेक राष्ट्रीयीकृत बँकांमध्ये ग्राहकांच्या रांगा पाहायला मिळत आहेत. अखेर सोमवारी (दि.23 मार्च) सायंकाळी मुख्यमंत्र्यांनी संचार बंदीचे आदेश लागू केले आहेत.
पंतप्रधान नरेंद्र मोदी यांच्या आवाहनानुसार 22 मार्च रोजी देशभरात जनता कर्फ्यु पाळण्यात आला. मात्र, सायंकाळी पाच वाजता थाळी व टाळीचा नाद करण्यासाठी अनेक नागरिक घराबाहेर पडत गर्दी केली आणि कर्फ्यूचे उल्लंघन झाले. राज्यात कोरोनाचे रुग्ण वाढतच असल्याने जमावबंदी आदेश लागू करण्यात आला आहे. त्यामुळे पाच व्यक्तीचा समूह एकत्र येण्यावर बंदी आहे. मात्र, या आदेशाची सर्रास पायमल्ली होत आहे.
बाहतूक सेवा बंद असली तरी शासकीय कार्यालये, बँक, किराणा दुकान, पेट्रोल पंप, रुग्णालये अशा अत्यावश्यक सेवा सुरू आहेत. त्यामुळे येथे नागरिकांची मोठी गर्दी दिसून येत आहे. बँकेमध्ये एक-दोन व्यक्तीलाच प्रवेश दिला जात असून बँकेच्या गेटवर ग्राहकांच्या रांगा बघायला मिळत आहेत. तर पेट्रोल पंपावरही वाहनांच्या रांगा दिसून येत आहेत. या प्रकारामुळे जमावबंदी आदेशाची पायमल्ली होत असल्याचे दिसून येते. नागरिकांनी घराबाहेर पडू नये, असे आवाहन करण्यात आल्यानंतरही नागरिक घराबाहेर पडत असल्याने पोलीसही हतबल झाले आहेत. चौकाचौकांमध्ये पोलिस तैनात करण्यात आले आहेत. मात्र सर्रासपणे नागरिकांकडून नियमाची पायमल्ली होत आहे.
हेही वाचा - गडचिरोली जिल्हावासियांनी यशस्वी केला 'जनता कर्फ्यू'
