गडचिरोली - राज्यात कोरोनाचा प्रादुर्भाव वाढत असताना टाळेबंदी सुरू करण्यात आली. टाळेबंदी दरम्यान सर्व व्यापार काही महिन्यांसाठी ठप्प झाले. यामुळे जनतेचे आर्थिक कंबरडे मोडलं असून जनतेचे मागील 4 महिन्यांचे वीजबिल माफ करावे व दूध उत्पादक शेतकऱ्यांना प्रती लिटर 10 रुपये अनुदान देण्यात यावे, या प्रमुख मागण्यांसाठी महाविकास आघाडी सरकारच्या विरोधात संपूर्ण गडचिरोली जिल्ह्यात भाजपाच्या वतीने शनिवारी (दि. 1 ऑगस्ट) महाएल्गार आंदोलन करण्यात आले.
गडचिरोली शहरातील गांधी चौकात भाजपचे आमदार, पक्षाचे पदाधिकारी आणि कार्यकर्ते या आंदोलनात मोठ्या संख्येने उपस्थित होते. यावेळी महाविकास आघाडी सरकारविरुद्ध घोषणा देत मागील 4 महिन्यांची वीजबिल माफ करावे व दूध उत्पादकांना प्रती लिटर 10 रुपये द्यावे, अशी मागणी करण्यात आली. जिल्हा परिषदेच्या संपूर्ण गण व गटामध्ये हे आंदोलन झाले. यावेळी महाविकास आघाडी सरकारच्या विरोधात जोरदार घोषणाबाजी करण्यात आली.
