गडचिरोली - बैल चारत असलेल्या शेतकऱ्यावर दोन अस्वलांनी अचानक हल्ला केला. या हल्ल्यात शेतकरी गंभीर जखमी झाला आहे. आज सकाळी ८ वाजताच्या सुमारास भामरागड तालुक्यातील लष्कर या गावात ही घटना घडली. मासु कोमटी तिम्मा असे हल्ल्यात जखमी झालेल्या शेतकऱ्याचे नाव आहे.
मासू तिम्मा यांच्यावर अस्वलांनी केलेल्या हल्लात त्यांचे पोट फाटल्यामुळे आतडे बाहेर आले. तसेच पायावर, चेहऱ्यावर आणि शरिराच्या अनेक भागांवर अस्वलांनी जखमा केल्या आहेत. कसाबसा जीव वाचवून मासु तिम्मा यांनी गावाकडे धाव घेतली. यानंतर त्यांना भामरागड येथील ग्रामीण रूग्णालयात दाखल करण्यात आले.
या ठिकाणी डॉ. वानखेडे यांनी प्राथमिक उपचार केला. प्रकृती गंभीर असल्यामुळे पुढील उपचारासाठी त्यांना अहेरी येथील उपजिल्हा रूग्णालयात हलविण्यात आले आहे. याबाबत तिम्मा यांचा मुलगा प्रकाश याने वनविभागाकडे अर्ज करून उपचारासाठी मदत करण्याची मागणी केली आहे. या घटनेमुळे लष्कर परिसरात अस्वलांची दहशत पसरली आहे.
