धुळे - वाढत्या बेरोजगारी विरोधात राष्ट्रवादी युवक काँग्रेसच्या वतीने धुळ्यात पकोडे तळून शासनाचा निषेध करण्यात आला. भाजप सरकारने गेल्या 5 वर्षात बेरोजगारी वाढवली असल्याचा आरोप करत याचा निषेध करण्यासाठी 'पकोडे तळो' आंदोलन करण्यात आले.
गेल्या 5 वर्षात रोजगाराची स्थिती ही अतिशय भयानक झाली आहे. या बेरोजगारीविरोधात आंदोलन करून देखील अद्यापही दखल घेण्यात आलेली नाही. भाजप सरकारच्या कार्यकाळात रोजगारवाढीसाठी कोणतेही ठोस उपाय झालेले नाहीत. बेरोजगारीने भारतात उच्चांक गाठला आहे. या बेरोजगारीमुळे युवा वर्ग गुन्हेगारीकडे वळत असून याचे दुष्परिणाम देशाला भोगावे लागत आहे. लाखो विद्यार्थी उच्चशिक्षित असूनदेखील त्यांना रोजगार मिळत नसल्याने तरुणांच्या मनात नैराश्य वाढत आहे. या बेरोजगारीच्या निषेधार्थ राष्ट्रवादी युवक काँग्रेसच्या वतीने पकोडे तळो आंदोलन करण्यात आले.
या आंदोलनात राष्ट्रवादी युवक काँग्रेसचे पदाधीकारी कार्यकर्ते आणि तरुण सहभागी झाले होते. या आंदोलनाने नागरिकांचे लक्ष वेधून घेतले. शासनाने तरुणांच्या हाताला रोजगार मिळून द्यावा, अन्यथा तीव्र स्वरूपाचे आंदोलन करण्यात येईल, असा इशारा राष्ट्रवादी युवक काँग्रेसच्या वतीने यावेळी देण्यात आला.
