धुळे - नाभिक समाज महासंघाच्या वतीने विविध मागण्यांसाठी धुळे जिल्हाधिकारी कार्यालयासमोर निदर्शने करण्यात आली. आंदोलकांच्या प्रमुख मागण्यांमध्ये, देशातील इतर राज्यांप्रमाणे नाभिक समाजाचा अनुसूचीत जाती प्रवर्गात समावेश करावा, त्यादृष्टीने त्यांना सर्व प्रकारचे लाभ आणि संरक्षण मिळावे, नाभिक समाजासाठी आर्थिक विकास महामंडळ स्थापन करावे आदींचा समावेश आहे.
याशिवाय, वीर शिवाजी काशीद, शूरवीर जिवाजी महाला यांचे स्मारक उभारून त्याला पर्यटन स्थळाचा दर्जा दिला जावा, रेल्वे स्टेशन, बस स्थानक, बाजारपेठ अशा ठिकाणी सलून व्यवसायासाठी राखीव जागा उपलब्ध करून द्यावी, नाभिक समाजासाठी ॲट्रॉसिटीचे नियम लागू करून संरक्षण द्यावे आदी मागण्यांचा देखील आंदेलकांनी केल्या आहेत. यावेळी उपस्थितांनी जिल्हाधिकारी डी. गंगाथरन यांना मागण्यांबाबतचे निवेदन दिले. मागण्या मान्य न झाल्यास तीव्र आंदोलन करण्याचा इशाराही यावेळी नाभिक समाज महासंघाच्या वतीने देण्यात आला आहे.
