धुळे - राज्यात महाविकास आघाडीचे सरकार आल्यानंतर त्याचे परिणाम धुळे जिल्ह्याच्या राजकारणावर होणार आहे. माजी आमदार अनिल गोटे हे गुरुवारी शरद पवारांच्या वाढदिवसाचे औचित्य साधून मुंबईत राष्ट्रवादी काँग्रेस पक्षात अधिकृत प्रवेश करणार आहेत.
यंदाच्या विधानसभा निवडणुकीत विविध समीकरणामुळे अनिल गोटे यांचा काही मतांनी पराभव झाला. त्यामुळे तब्बल ३ टर्म धुळे शहराचे आमदार असलेले अनिल गोटे कोणती भूमिका घेतात याकडे सर्वांचे लक्ष लागून राहिले होते. धुळे शहर विकासासाठी सक्षम लोकप्रतिनिधी हवा अशी मागणी आजही कायम आहे. त्यामुळे राष्ट्रवादी पक्षात अधिकृतरीत्या प्रवेश करून विधान परिषदेच्या मार्ग सुकर होऊ शकतो, हे लक्षात घेत गोटे यांनी राष्ट्रवादीत प्रवेश करण्याचा निर्णय घेतला असावा. दरम्यान शहरात माजी आमदार राजवर्धन कदमबांडे यांच्या राजीनाम्यानंतर राष्ट्रवादीकडेही सक्षम नेतृत्व नाही. गोटे यांच्या प्रवेशानंतर राष्ट्रवादीला पुन्हा नवीन उत्साह मिळून त्याचा फायदा जिल्हा परिषद निवडणुकींसाठी होऊ शकतो.
हेही वाचा - धुळे: विजेचा धक्का लागून चार वर्षीय बालकाचा मृत्यू
गोटे यांच्या राष्ट्रवादी प्रवेशामुळे धुळे जिल्ह्याचे राजकीय समीकरण निश्चितच बदलणार आहे. त्यांच्या राजकीय कौशल्याचा फायदा महाविकास आघाडीच्या सरकारला निश्चितच होऊ शकतो. भाजपला सडेतोड उत्तर देण्यासाठी गोटे यांची क्षमता लक्षात घेऊन राष्ट्रवादीचे अध्यक्ष शरद पवार यांनी नवीन निती आखत अनिल गोटेंचा समावेश केला असावा, त्यांना विधान परिषदेवर घेऊन आमदार केले जाणार असल्याचीही चर्चा आहे. तसे झाले तर पुन्हा भाजपला धूळ चारण्यासाठी गोटे सज्ज होऊ शकतात.
हेही वाचा - उन्नाव बलात्कार प्रकरण : आरोपींवर कठोर कारवाई करा, सत्यशोधक विद्यार्थी संघटनेचा कँडल मार्च
