धुळे - शहरातील कुमारनगर भागात राहणाऱ्या एका चार वर्षीय बालकाचा विजेचा धक्का लागून मृत्यू झाला. लव्यम रेलन असे या बालकाचे नाव असून मंगळवारी रात्री ही घटना घडली. या घटनेमुळे नागरिकांमधून वीज वितरण कंपनी विरोधात तीव्र संताप व्यक्त होत आहे.
शहरातील कुमारनगर भागात असलेल्या एका विद्युत खांबामधून वीज प्रवाहित होत असल्याची तक्रार नागरिकांनी गेल्या काही दिवसांपूर्वीच वीज वितरण कंपनीकडे केली होती. यामुळे एखाद्या नागरिकाचा मृत्यू होण्याची देखील शक्यता वर्तवण्यात आली होती. मात्र, तक्रार करून देखील वीज वितरण कंपनीने याची दखल घेतली नाही.
हेही वाचा - आता बाळासाहेब हिंदुहृदयसम्राट नाही तर वंदनीय, चंद्रकांत पाटलांचा सेनेवर निशाणा
मंगळवारी रात्री लव्यम खेळत असताना त्याचा या विद्युत खांबाला स्पर्श झाला. विजेचा धक्का बसून त्याचा जागीच मृत्यू झाला. या घटनेनंतर परिसरातील नागरिकांमधून वीज वितरण कंपनी विषयी तीव्र संताप व्यक्त होत आहे. झालेल्या घटनेला पुर्णत: वीज वितरण कंपनीच जबाबदार असून याप्रकरणी दोषींवर कठोर कारवाई करावी, अशी मागणी नागरिकांनी केली आहे.
