चंद्रपूर : अंशदायी पेन्शन योजना रद्द करून जुनी पेंन्शन योजना लागू करावी या प्रमुख मागणीसाठी राज्यातील कर्मचारी बेमुदत संपावर आहेत. या संपाला शिक्षक संघटनांनीसुद्धा पाठिंबा दिला आहे. त्यामुळे तालुक्यातील लाडबोरी येथील जिल्हा परिषद शाळेचे शिक्षक संपात सहभागी झालेत. मागील तीन दिवसांपासून शिक्षक नसल्याने विद्यार्थी शाळेत जातात. मात्र शिक्षक संपावर असल्याने विद्यार्थ्यांना तसेच वापस परतावे लागत आहे. या प्रकारामुळे कंटाळलेल्या विद्यार्थ्यांनी विविध मागण्यांसाठी आज चिमूर-सिंदेवाही या मुख्य मार्गावर रास्ता रोको आंदोलन केले.
रास्ता रोको आंदोलन : त्यानंतर सिंदेवाही पोलिसांनी पंचायत समितीच्या अधिकाऱ्यांशी चर्चा करून तोडगा काढण्याचे आश्वासन देत विद्यार्थ्यांना शाळेत परत पाठविले. विद्यार्थ्यांच्या या आंदोलनामुळे शिक्षण विभागात चांगलीच खळबळ उडाली आहे. लाडबोरी येथे जिल्हा परिषद उच्च प्राथमिक शाळा आहे. पहिली ते सातवीचे वर्ग असून, पाच शिक्षक नियुक्त आहेत. परीक्षा जवळ आली असूनही अभ्यासक्रम पूर्ण झालेला नाही. त्यात संपामुळे मागील तीन दिवसांपासून एकही शिक्षक शाळेत हजर नाही. त्यामुळे विद्यार्थी नेहमीप्रमाणे सकाळी शाळेत येतात. सायंकाळी पुन्हा परत घरी जातात. या काळात विद्यार्थ्यांना दुपारी देण्यात येणारी खिचडीचे वाटपही करण्यात आलेले नाही. त्यामुळे विद्यार्थ्यांनी स्वयंस्फूर्तीने सिंदेवाही-चिमूर या मुख्य मार्गावर रास्ता रोको आंदोलन सुरू केले. आंदोलनाची माहिती मिळताच सिंदेवाहीचे सहायक पोलिस निरीक्षक तुषार चव्हाण हे पोलिस पथकासह लाडबोरी गावात दाखल झाले. आंदोलनकर्त्या विद्यार्थ्यांची समजूत काढली. पंचायत समितीच्या अधिकाऱ्यांसोबत चर्चा करून समाधानकारक तोडगा काढू, असे आश्वासन दिले. त्यानंतर विद्यार्थ्यांनी आंदोलन मागे घेतले.
शिक्षक नसल्याने विद्यार्थ्यांचे नुकसान : विद्यार्थ्यांच्या आंदोलनाची माहिती मिळताच गटविकास अधिकारी अक्षय सुक्रे यांनी जिल्हा परिषद शाळा लाडबोरी येथे भेट दिली. त्यानंतर शाळा व्यवस्थापन समितीचे पदाधिकारी, सदस्य, सरपंच, उपसरपंच, पालक, नागरिकांशी चर्चा केली. तसेच विद्यार्थ्यांच्या मागणीचे पत्र पंचायत समितीकडे पाठविल्यानंतर तोडगा काढण्यात येईल, असे सांगितले. शिक्षक नसल्याने विद्यार्थ्यांचे नुकसान होत आहे. त्यामुळे यांसदर्भात तातडीने तोडगा काढून विद्यार्थ्यांचे होणारे नुकसान टाळावे, अन्यथा विद्यार्थ्यांसह सर्व गावकरी चक्का जाम आंदोलन करू, असा इशारा यावेळी गटविकास अधिकारी यांना दिलेल्या पत्रातून देण्यात आला आहे.
विद्यार्थ्यांना शिकविण्याचे काम शिक्षकांचे : संपामुळे शिक्षक नसल्याने विद्यार्थ्यांचे शैक्षणिक नुकसान होत असल्याचे पत्र बुधवारी गटविकास अधिकारी अक्षय सुक्रे यांना देण्याकरिता गेलो होतो. तेव्हा त्यांनी पत्र आवकजावकमध्ये देण्यास सांगितले. परंतु, संपामुळे कार्यालयात एकही कर्मचारी हजर नव्हता. त्यामुळे पत्र देता आले नाही, असे उपसरपंच मंगेश दडमल यांनी सांगितले. गटविकास अधिकारी सुक्रे यांनी, विद्यार्थ्यांना आंदोलन करू देऊ नका. विद्यार्थ्यांवर शाळा व्यवस्थापन समिती, ग्रामपंचायत, बचतगटाने लक्ष द्यावे, असे सांगितले. विद्यार्थ्यांना शिकविण्याचे काम हे शिक्षकांचे आहे, आमचे नाही, असे शाळा व्यवस्थापन समितीच्या अध्यक्ष जोसना कारमेंगे यांनी सांगितले.
