चंद्रपूर - अवकाळी पावसाने शेतपिकांचे मोठे नुकसान केले. धान, सोयाबीन भुईसपाट झाली. अर्ध्या अधिक कपाशीचे शेत वाया गेले. कपाशीला जेमतेम बोंडे फुटली. फुटलेला कापूस वेचायला आता मजूर मिळेनासे झाले आहेत. त्यात कापूस वेचनी ८ रुपये प्रतिकिलो गेली आहे. अस्मानी संकटाने बळीराजाचे कंबरडे मोडले आहे. आता मजूर टंचाई देखील बळीराजाच्या जीवावर उठली आहे.
हवामान खात्याचा भविष्यवाणीवर बळीराजाने विश्वास ठेवला. लगबगीने पेरणी आटोपली. हवामान खात्याचा अंदाज खोटा ठरला. पाऊस तब्बल महिनाभर उशिराने बरसला. पावसाच्या लपंडावाने बळीराजावर दूबार, तिबार पेरणीचे संकट ओढावले. मोठ्या हिंमतीने बळीराजाने शेती उभी केली. शेतातील कपाशीचे पिक बहरले. मात्र, निसर्गाने पुन्हा घात केला. अवकाळी पावसाच्या तड्याखात शेतातील पिकांचे नुकसान झाले. धान, सोयाबीनचे पीक डोळ्यादेखत उद्ध्वस्त झाले. काही प्रमाणात शेतात कपाशी शिल्लक राहिली. मात्र, आता वेचणीसाठी मजूर मिळत नसल्याने बळीराजा हतबल झाला आहे. कापसाची वेचणी केली नाही तर कापशाची प्रतवारी खराब होते. त्याचा परिणाम कापसाच्या किंमतीवर होत असते. परिणामी बळीराजाला आर्थिक फटका बसतो. त्यासाठी मजुरांची शोधमोहीम सुरू आहे. मात्र, मिळालेले मजूर कापूस वेचणीचे ८ रुपये प्रतिकिलो दर घेत आहे. त्यामुळे बळीराजाची अडचण वाढली आहे.
गेल्या वर्षीच्या तुलनेत कापूस वेचणीचे अधिक भाव -
गेल्या वर्षी ५ ते ६ रुपये प्रतिकिलो दराने कापूस वेचणी केल्या गेली. मात्र, यावर्षी सुरुवातीलाच वेचणीचे भाव दुप्पट झाले आहे. मजूर टंचाईमुळे शेतकऱ्यांना कापूस वेचणीसाठी आर्थिक भुर्दंड सोसावा लागत आहे.
