चिमूर( चंद्रपूर) - बामनगाव येथील एक दाम्पत्य शेताला कुंपण करण्यासाठी दुपारच्या वेळी शेतात गेले होते. यावेळी वाघाने केलेल्या हल्ल्यात शेतकऱ्याचा मृत्यू झाला आहे. ही घटना गुरुवारी दुपारच्या सुमारास घडली. राज्यपाल दयाराम नागोसे (वय ३५) असे हल्ल्यात ठार झालेल्या शेतकऱ्याचे नाव आहे.
परिसरात रोहणी नक्षत्राचा पाऊस पडल्याने शेतकरी शेतीच्या कामाला लागला आहे. शेतातील पिक जंगली जनावरांनी खावू नये म्हणून कुंपण करण्यासाठी शेतकरी आणि त्याची पत्नी दोघेही शेतात गेले होते. मात्र, शेतकरी झाडाच्या फांद्या तोडत असतानाच शेतात दबा धरुन बसलेल्या वाघाने त्याच्यावर हल्ला केला. या हल्ल्यात शेतकरी जागीच ठार झाला.
काही अंतरावर शेतात काम करत असलेल्या पत्नीला या घटनेची माहिती नव्हती. बऱ्याच वेळापासून पतीचा आवाज येत नसल्याने तिने शोधाशोध सुरु केली असता तिला वाघ आणि तीन बछडे दिसले. महिलेने आरडाओरड करत गावातील नागरिकांना याबद्दल माहिती दिली. नागरिकांनी तात्काळ शेताकडे धाव घेतली, मात्र तोपर्यंत वाघ व बछड्यांनी जंगलाकडे पळ काढला होता.
नागरिकांनी वनविभागाला याबद्दलची माहिती दिली. मात्र, वनविभागाचे अधिकारी, कर्मचारी दीड तासाने घटनास्थळी पोहोचले. या परिसरात वाघांनी अनेकदा शेतकऱ्यांवर हल्ले केले आहेत. त्यामुळे, नागरिकांमध्ये भीतीचे वातावरण आहे. अशात या वाघांचा त्वरित बंदोबस्त करण्याची मागणी शेतकरी करत आहेत.
