मुंबई - ईशान्य मुंबईमधील भाजप उमेदवार मनोज कोटक यांच्यासाठी गुजरातचे मुख्यमंत्री विजय रुपानी यांनी सभा घेतली. घाटकोपर येथील गुजराती भाषिक वस्त्यांमध्ये रोड शो केला. त्यानंतर ते भानुशाली वाडी येथील प्रचार सभेत बोलत होते. यावेळी गृहनिर्माणमंत्री प्रकाश मेहता, प्रवीण छेडा, नगरसेविका बिंदू त्रिवेदी, नगरसेवक परमेश्वर कदम आणि भालचंद्र शिरसाट आदी उपस्थित होते.
गुजराती भाषेत केलेल्या भाषणात रुपानी यांनी मजबूत सरकार देण्यासाठी मोदी यांच्या पाठीशी उभे राहण्याचे आवाहन गुजराती बांधवांना केले. तसेच काँग्रेसचा समाचार घेतला. काँग्रेसने भ्रष्टाचार केल्याने त्यांच्या अनेक नेत्यांवर केसेस दाखल असून ते जामिनावर बाहेर आहेत. मोदी स्वतः खात नाहीत आणि इतरांनाही खाऊ देत नाहीत, यामुळे मोदींचे सरकार भ्रष्टाचारमुक्त असल्याचे रूपानी यांनी सांगितले. यावेळी उपस्थितांनी जैन, कच्छी आणि गुजराती भाषिकांनी सकाळी दहा वाजण्याच्या आत मतदान करावे, असे आवाहन करण्यात आले.
