बुलडाणा - मुलभूत सुविधांपासून वंचित असलेल्या जिल्ह्यातील रत्नापुर गावाने आज मतदानावर बहिष्कार टाकला आहे. गावातील मतदान केंद्रावर एकही मतदार आज फिरकला नाही. विकास करा, त्याशिवाय मतदान करणारच नाही, असा निर्धार ग्रामस्थांनी केला आहे. त्यामुळे देशभरात लोकशाहीचा उत्सव म्हणून मतदान केले जात असताना, रत्नापुरात शून्य टक्के मतदान झाले आहे.
रत्नापुर गावाने मतदानावर संपूर्णपणे बहिष्कार घातला आहे. तर ३५८ मतदान असलेल्या या मतदान केंद्रावर स्मशानशांतता पसरली आहे.
विशेष म्हणजे मेहकर तालुक्यातील आणि विद्यमान खासदार प्रतापराव जाधव यांचा बालेकिल्ला अशी रत्नापूरची ओळख आहे. आदिवासी बहुल असलेल्या गावात स्वातंत्र्य मिळाल्यापासून मूलभूत सुविधादेखील मिळाल्या नाहीत. एक महिन्यापूर्वी गावकऱ्यांनी जिल्हाधिकाऱ्यांना निवेदनाद्वारे लोकसभा निवडणुकीवर बहिष्कार घालणार असल्याचा इशारा दिला होता. तरीही सरकारी आणि प्रशासकीय पातळीवरून प्रभावी पावले उचलण्यात आली नाहीत. जोपर्यंत गावाला सुविधा उपलब्ध होत नाही, तोपर्यंत मतदान करणार नसल्याचा पवित्रा गावकऱ्यांनी घेतला आहे.
ग्रामस्थ गणेश टाले म्हणाले की, गावाचा विकास झाला नाही. मतदानावर बहिष्कार टाकल्याशिवाय विकास होणार नाही, अशी ग्रामस्थांची धारणा झाली आहे. तरीही खासदार, खासदारांनी गावाकडे ढुंकून पाहिले नाही. गावात घरकुल योजना नाही तसेच रस्तेही नाहीत. लग्न व इतर समारंभासाठी सभागृह नाही. पाण्याची सुविधा नाही. साधी अंगणवाडी नसल्याने लहान मुलांना रस्त्यावर बसावे लागते. हे सरकार व प्रशासन झोपलेले आहे. त्यामुळे पंचायत, विधानसभा, जिल्हा परिषद अशा सर्वच निवडणुकांवर बहिष्कार राहणार आहे. गावात कोणताच विकास नसल्याचे प्रकाश शिंदे यांनी सांगितले. गावातील मतदा नाची टक्केवारी शून्य असल्याचा दुजोरा निवडणूक अधिकाऱ्यांनी दिला आहे.
मत मागणारे राजकीय पक्ष, नेते आणि मतदान केंद्रासाठी राबणारी प्रशासन यंत्रणा ग्रामस्थांच्या समस्या सोडविण्यासाठी पुढाकार घेणार का, हा प्रश्न अजूनही अनुत्तरीतच आहे.
