बुलडाणा - उच्च माध्यमिक शिक्षकांचे विविध मागण्यांसाठी एक दिवसीय धरणे आंदोलन चालू असताना, शिक्षकांना स्थानिक पोलीस कर्मचाऱ्याने अश्लील शिवीगाळ केल्याच्या व्हिडिओ सोशल मीडियावर व्हायरल होत आहे. कर्मचारी शिवीगाळ करत असताना महिला शिक्षिका बाजूला उभ्या असून, पोलिसांच्या या मनमानी कारभारावर संताप व्यक्त होत आहे. संबंधित पोलीस कर्मचारी हा गुप्तवार्ता विभागातील असून त्याचे नाव लहासे असल्याची माहिती मिळत आहे.
उच्च माध्यमिक शिक्षकांनी आपल्या मागण्यांकरीता 16 ऑगस्टला जिल्हाधिकारी कार्यालयासमोर एक दिवसीय धरणे आंदोलनाचे आयोजन केले होते. आंदोलनादरम्यान निवेदन देण्यासाठी पाच शिक्षकांचे शिष्टमंडळ निवासी जिल्हाधिकाऱ्यांच्या भेटीस जाणार होते.
मात्र, निवेदन देताना पाचहून अधिक शिक्षकांनी गर्दी केली. यामुळे बुलडाणा शहर पोलीस स्थानकातील गुप्तवार्ता विभागाचे लहासे नामक कर्मचारी आणि निवेदन देणाऱ्या शिक्षकांमध्ये वादविवाद झाला. यावेळी लहासे यांच्या तोंडून अश्लील शब्द उच्चारला गेला. या घटनेचा व्हिडिओ सध्या सोशल मीडियावर व्हायरल होत आहे.
