बुलडाणा: जिल्ह्यातील शेतकरी वर्ग अवकाळी पावसाने झालेल्या नुकसानीमुळे त्रस्त झाला आहे; मात्र त्यांच्या समस्यांचे निराकरण करण्यासाठी प्रशासकीय बैठका घेतल्या गेल्या नाही. त्यामुळे स्वाभिमानी शेतकरी संघटनेच्या वतीने चौकाचौकात पालकमंत्री बेपत्ता आणि शोधून आणणाऱ्यास 51 रुपयांचे बक्षीस, असे जाहीर करण्यात आले आहे.
बळीराजा अडचणीत: अवकाळी पावसाने बळीराजा अनेक अडचणींचा सामना करत आहे आणि त्यातच येणाऱ्या पुढील हंगामासाठी पैशांची जुळवाजवळ करण्याकरिता त्याला मोठी कसरत करावी लागणार आहे. यावर्षी त्याच्या हातातोंडाशी आलेला नगदी पिकांचा घास निसर्गाने हिरावून घेतल्यानंतर आंतरपीक असलेले फळभाज्या देखील मातीमोल झाल्या आहेत. अवकाळीने नगदी पीक हिरावून घेतल्याने शेतकरी चिंताग्रस्त आहे.
स्वाभिमानी शेतकरी संघटनेचा रोष: शेतकऱ्यांना पीक विम्याचे पैसे मिळालेले नाही. त्यातच तुरीची खरेदी देखील बंद आहे. नुकसान झालेल्या पिकांचे पंचनामे अद्यापही रखडले आहेत. त्याकरिता पालकमंत्री गुलाबराव पाटील यांनी लक्ष घालावे यासाठी स्वाभिमानी शेतकरी संघटनेच्या वतीने ते बेपत्ता असल्याचे पोस्टर लावण्यात आले आहेत. बुलडाणा जिल्ह्यात मागील महिना भरापासून अवकाळी पाऊस कोसळत आहे. हजारो हेक्टर शेतीसह ठिकठिकाणी घरांची पडझड आणि नुकसान झाले आहे. मोठ्या प्रमाणात शेतकऱ्यांचे नुकसान झाल्यानंतरही जिल्ह्याचे पालकमंत्री गुलाबराव पाटील अद्याप शेताच्या बांध्यावर फिरकले नसल्याने स्वाभिमानी शेतकरी संघटनेने रोष व्यक्त केला आहे.
पालकमंत्री का फिरकले नाही? बुलडाणा जिल्ह्यात गेल्या काही दिवसांमपासून सातत्याने अवकाळी पाऊस थैमान घालत आहे. जिल्ह्यात हजारो हेक्टर शेतीचे अवकाळी पावसामुळे नुकसान झाले आहे. त्यामुळे शेतकऱ्याच्या तोंडाशी आलेला घास वाया गेला आहे. मोठ्या प्रमाणात शेतकऱ्यांचे नुकसान झाल्यानंतरही जिल्ह्याचे पालकमंत्री गुलाबराव पाटील अद्याप जिल्ह्यात फिरकले नसल्याने स्वाभिमानी शेतकरी संघटनेने पालकमंत्री गुलाब पाटील हरवले आहे का? असा सवाल उपस्थित करण्यात आला आहे. मात्र पालकमंत्री गुलाबराव पाटील बुलडाणा जिल्ह्यात शेतकऱ्यांच्या बांधावर का जात नाहीत, यावर आमदार संजय गायकवाड यांनी रविकांत तुपकर यांना प्रत्युत्तर दिले आहे. एका मंत्र्यांकडे चार-चार पाच-पाच जिल्ह्याचे पालकत्व असल्याने ही अडचण होत आहे. भाजप शिवसेनेचे आमदार खासदार हे शेतकऱ्यांच्या बांधावर जात आहेत. शेतकऱ्यांच्या अडचणी सोडवण्यासाठी आमचे आमदार खासदार सक्षम असल्याचे आमदार संजय गायकवाड म्हणाले आहेत. जेव्हा आम्ही कमी पडू तेव्हा आम्ही पालकमंत्र्यांना बोलावू असेही संजय गायकवाड म्हणाले.
हेही वाचा: Sex Racket Busted : मुलींचे कौमार्य तोडण्यासाठी लाखांचा सौदा; सेक्स रॅकेट चालवणाऱया दोघींना अटक
