बुलडाणा - कोरोना काळामध्ये काम करणाऱ्या पत्रकारांचा फ्रंटलाइनमध्ये समावेश करून त्यांनाही कोरोना लस देण्यात यावी. तसेच कोरोनामुळे मृत्युमुखी पडलेल्या पत्रकारांच्या कुटुंबीयांना तात्काळ विम्याची पन्नास लक्ष रुपयांची रक्कम देण्यात यावी, अशी मागणी बुल़डाणा जिल्हा टीव्ही जर्नालिस्ट असोसिएशन आणि जिल्हा पत्रकार संघाच्या वतीने मुख्यमंत्री उद्धव ठाकरे यांच्याकडे एका निवेदनाद्वारे करण्यात आली.
यावेळी असोसिएशनचे अध्यक्ष वसीम शेख, सचिव युवराज वाघ, समन्वयक कासिम शेख, कोषाध्यक्ष दीपक मोरे, प्रवक्ता संदीप शुक्ला, गणेश सोळंकी,संजय जाधव, प्रसिद्धीप्रमुख नितीन कानडजे पाटील, बुलडाणा समन्वयक निलेश राऊत तालुका हे उपस्थित होते. यावेळी मराठी पत्रकार परिषदेचे उपाध्यक्ष राजेंद्र काळे, जिल्हा पत्रकार संघाचे अध्यक्ष अरुण जैन, सिद्धेश्वर पवार,सिद्धार्थ आराख, अजय बिल्लारी यांच्यासह संघाचे पदाधिकारी उपस्थीत होते. मुख्यमंत्री उद्धव ठाकरे शुक्रवारी 5 फेब्रुवारीला बुलडाण्याच्या लोणार येथे दौऱ्यावर आले होते. त्यावेळी त्यांना हे निवदेन सादर करण्यात आले.
-फ्रंटलाइनला काम करणाऱ्यासोबत पत्रकारांनी जनजागृतीचे केले काम-
कोरोना काळामध्ये ज्याप्रमाणे आरोग्य कर्मचारी, पोलीस विभागाचे कर्मचारी, अधिकारी समाज सेवा करण्यासाठी कार्यरत होते. यांच्या खांद्याला खांदा लावून लोकशाहीचा चौथा आधारस्तंभ असलेले पत्रकार सुद्धा कोरोना काळात समाजामध्ये जनजागृतीचे काम करत होते. त्यांचा समावेश सुद्धा फ्रंटलाइन कर्मचारी म्हणून करत त्यांनाही कोरोना प्रतिबंधात्मक लस देण्यात यावी, अशी मागणी करण्यात आली.
कोरोनामुळे मृत्युमुखी पडलेल्या पत्रकार बांधवांच्या कुटुंबीयांना विम्याची रक्कम द्या-
कोरोना काळामध्ये कर्तव्य बजावत असताना कोरोनामुळे काही पत्रकारांचा दुर्दैवाने मृत्यू झाला. अशा पत्रकार बांधवांच्या कुटुंबीयांना विमा निधीतून पन्नास लाख रुपये तात्काळ देण्यात यावेत, अशी मागणी टीव्ही जर्नलिस्ट असोसिएशनच्यावतीने मुख्यमंत्र्यांकडे निवेदनाद्वारे लोणार येथे करण्यात आली.
