बुलडाणा - भाजपच्या नेत्या तथा देशाच्या माजी विदेशमंत्री सुषमा स्वराज यांच्या निधनाच्या बातमीने देशावर शोककळा परसरली असून बुलडाण्यात स्वराज यांनी जिल्ह्याकरता दिलेल्या पासपोर्ट केंद्रामूळे मुस्लिम समाज कधीही विसणार नाही, अशा प्रतिकीऱ्या जमाते इस्लामी हिंद बुलडाणा शहर अध्यक्ष तथा मोती मस्जिद इमाम हाफिज मुजाहिद कुरेशी यांनी दिली आहे.
मंगळवारी (6 ऑगस्ट) भाजपच्या नेत्या तथा माजी विदेशमंत्री सुषमा स्वराज यांचे ह्रदय विकाराच्या झटक्याने निधन झाले. सुषमा स्वराज हे बुलडाणा जिल्ह्यासाठी आणि विशेष म्हणजे मुस्लिम समाजासाठी कधी न विसरणाऱ्या व्यक्तिमत्व आहे. पूर्वी बुलडाणा जिल्ह्यात पासपोर्ट (पारपत्र) कार्यालय नव्हते. त्यासाठी येथील नागरिकांना तब्बल ४०० किलोमिटरचा प्रावस करून नागपूरला जावे लागत होते.
दरम्यान, हज यात्रेला जाण्यासाठी पासपोर्ट तयार करण्यासाठी ३५ वर्षीय मोहम्मद इमरान हे १४ मे, २०१८ रोजी आपल्या परिवारासह नागपूरला जात होते. त्यावेळी त्यांच्या वाहनाचा अमरावती येथे भीषण अपघात झाला. त्यामध्ये त्यांच्या पत्नी मुमताज अंजुम या जागीच ठार झाल्या होत्या. तर त्यांच्यासह त्यांची तीन मुले जखमी झाली होती त्यात त्यांचा ४ महिन्याचा मुलगा होता. हा मुद्दा अमरावतीचे माजी खासदार आनंदराव अडसूळ यांनी लोकसभेत मांडून सुषमा स्वारज यांना प्रत्येक जिल्ह्यात पासपोर्ट कार्यालय सुरू करण्याची मागणी केली होती. त्याचबरोबर बुलडाण्याचे खासदार प्रतापराव जाधव यांनी पाठपुरावा केला. त्यानंतर २५ जानेवारी, २०१९ रोजी डाक कार्यालयात पासपोर्ट कार्यालयाचे उद्घाटन करण्यात आले.
सध्या बुलडाणा पोस्ट मास्तर छगन गोसावी यांच्या सानिध्यात बुलडाणा डाक कार्यालयात पासपोर्ट अधिकारी म्हणून विजय तायडे काम पाहत आहेत. दररोज सुमारे ४० पासपोर्टचे नोंदणी करण्यात येत असून बुलडाणा जिल्ह्यातीलच नव्हे तर आस-पासच्या जिल्ह्यातील नागरिक पासपोर्ट केंद्राचा लाभ घेत आहे.
यंदाच्यावर्षी हज यात्रेला जाणाऱ्या बुलडाणा जिल्ह्यातील मुस्लिम समाजाच्या नागरिकांना बुलडाणा पासपोर्ट केंद्रातूनच पासपोर्ट मिळाले आहेत. परदेशी अडकलेल्या अनेक नागरिकांना एका टि्वटवरून मायदेशी आणल्यामूळे मुस्लिम समाज सुषमा स्वराज यांना कधीही विसरणार नाही, अशी प्रतिकिया मोती मस्जिदचे इमाम हाफिज मुजाहिद कुरेशी यांनी दिली आहे.
