बुलडाणा - तुम्हाला विचारलं की पक्ष्याच्या जातीतील काळ्याकुट्ट रंगाचा पक्षी कोणता, तर पहिलं नाव येते ते म्हणजे कावळ्याचे,आणि जर तुम्हाला विचारले की, तुम्ही कधी पांढरा कावळा पाहिला का ? तर तुमचे उत्तर असेल की, पांढऱ्या रंगाचा कुठं कावळा असतो का? मात्र तुमचे उत्तर चुकीचे आहे. कारण बुलडाणा जिल्ह्याच्या खामगाव तालुक्यातील बोरीअडगाव परिसरात एका पांढऱ्या रंगाच्या कावळ्याचे दर्शन होत आहे. गावातील शिवाजी पाटील यांनी आपल्या मोबाईलच्या कॅमेऱ्यात या पांढऱ्या कावळ्याचा व्हिडिओ कैद केला. हा व्हिडिओ त्यांनी सोशल मीडियावर व्हायरल केला. त्यामुळे हा पांढरा कावळा गेल्या काही दिवसांपासून नागरिकांचे लक्ष वेधून घेत असून याला पाहण्यासाठी लोकांची उत्सुकता शिगेला पोहोचली आहे.
पांढरा कावळाच असल्याची शिवाजीराव पाटलांना पटली खात्री
बुलडाणा जिल्ह्यातील खामगाव तालुक्यातील बोरीअडगाव येथील शिवाजीराव पाटील हे आपल्या घराजवळ बसलेले असताना त्यांना या परिसरातील झाडावर पांढरा कावळा दिसून आला आहे. त्यांनी यावेळी कुतूहलाने या कावळ्याचे निरीक्षण केले, तेव्हा त्या पक्ष्याची ठेवण, चोच आणि डोळे हे नेहमीच्या कावळ्या सारखेच असल्याचे त्यांच्या लक्षात आले. त्याचा आवाज ऐकल्यावर तो कावळाच असल्याची खात्री त्यांना पटली. यांनी ही बाब शेजारच्यांना सांगितली व त्यांनी आपल्या मोबाईलच्या कॅमेऱ्यात छायाचित्रे आणि व्हिडिओ कैद केले. हे व्हिडिओ त्यांनी सोशल मीडियावर व्हायरल केले. त्यानंतर मात्र या पांढऱ्या कावळ्याचे कुतूहल संपूर्ण परिसरात पसरले आहे. प्रत्येक नागरिक त्या परिसरात त्या पांढऱ्या कावळ्याचे दर्शन होते का यासाठी निरीक्षण करताना दिसून येत आहे. तसेच या पांढऱ्या रंगाच्या कावळ्याचे दर्शन झाल्याने तालुक्यातील पक्षी प्रेमींमध्ये आनंदाचे वातावरण निर्माण झाले आहे.
