पवनीच्या परकोट किल्ल्यावर दीपोत्सव; ५ हजार दिव्यांच्या प्रकाशात किल्ल्याचा कायापालट

विद्यार्थ्यांनी एकत्र येत पवनीच्या परकोट किल्ल्यावर दिव्यांची आरास करून दीपोत्सव साजरा केला. यावेळी गावातील कुंभार समाजास दिवाळीची मदत व्हावी, यासाठी त्यांच्याकडून 5,000 दिवे विद्यार्थ्यांनी विकत घेतले.

भंडारा - पवनी तालुक्यातील विद्यार्थ्यांनी सोशल मीडियाच्या माध्यमातून एकत्रित येत उपेक्षित असलेल्या पवनीच्या परकोट किल्ल्यावर दिव्यांची आरास करून दीपोत्सव साजरा केला. महाराष्ट्रातील इतर किल्ल्यावर दिव्यांची होणारी आरास बघून आपल्याही गावातील किल्ल्याची आरास करावी, असे विद्यार्थ्यांना वाटत होते. त्यातूनच हा उपक्रम राबवण्या आला. तसेच गावातील कुंभार समाजास दिवाळीची मदत व्हावी, यासाठी त्यांच्याकडून 5,000 दिवे विकत घेऊन किल्ल्यावर हा दीपोत्सव साजरा करण्‍यात आला.

पवनीच्या परकोट किल्ल्यावर दीपोत्सव

सोशल मीडियाच्या माध्यमातून दीपोत्सवासाठी विद्यार्थी आले एकत्र -

पवनी तालुक्यात गोंड राजाचा 350 वर्षे जुना किल्ला आजही अस्तित्वात आहे. परंतु हा किल्ला उपेक्षित असून याकडे कोणाचे लक्ष नाही. कधीकाळी येथे स्वच्छता केली जाते. मात्र, एरवी हा दुर्लक्षित असतो. पुरातत्व विभागाच्या विद्यार्थ्यांना याठिकाणी आणून या किल्ल्याचे महत्व आणि त्याची भव्यदिव्यता दाखवली जाते. मात्र जिथे संपूर्ण महाराष्ट्रात किल्ल्यावर दिवाळीत दिव्यांची रोषणाई केली जाते तिथे आपल्या शहरातील किल्ल्यावर कधीच रोषणाई केली जाते नाही, याची खंत पवनीतील काही विद्यार्थांना जाणवली. आपण ही आपला या दिवाळीत हा किल्ला दिव्यांच्या प्रकाशात उजळून काढू, असे ठरवत तसा मेसेज समाजमाध्यमातून सर्वत्र पसरविला गेला.

परकोट किल्ल्यावर जमलेले विद्यार्थी

हेही वाचा - 'एक दिवा हुतात्म्यांसाठी' या उपक्रमातून हुतात्मा राजगुरू वाड्यावर दीपोत्सव साजरा

तब्बल 5 हजार दिव्यांनी किल्ला झाला प्रकाशमय -
किल्ल्यावर विजेची रोषणाई करणे खर्चिक आणि न परवडणारे काम होते. तसेच कोरोनामुळे कुंभार समाजाच्या लोकांवर मोठे आर्थिक संकटे ओढवले होते. एका चांगल्या उपक्रमातून दोन उद्देश साध्य करीत या विद्यार्थ्यांनी आपल्याच गावातील कुंभार समाजाला आर्थिक मदत करण्याच्या उद्देशातून त्यांच्याकडून मातीचे 5000 दिवे घेतले. यामुळे कुंभार समाजाची दिवाळी प्रकाशमय झाली.

दीपोत्सव पाहण्यासाठी नागरिकांची गर्दी -
पहिल्यांदा झालेल्या दीपोत्सवमुळे या परकोट किल्ल्याचा कायापालट झाला. दिव्यांच्या प्रकाशात त्याला एक नवीन आणि आकर्षित करणारे रुप मिळाले. किल्ल्याचा हा नवीन रुप पाहण्यासाठी पवनीकरांनीही मोठी गर्दी केली होती. दिवाळीच्या निमित्ताने का होईना, या उपक्रमातून गावात असलेले सर्व विद्यार्थी एकत्र आले. गावातील कुंभारांना काम मिळाले. दुर्लक्षित असलेल्या किल्ल्याला त्याचे वैभव प्राप्त झाले. त्यामुळे गावात विद्यार्थ्यांनी सुरू केलेल्या या नवीन उपक्रमाची गावकऱ्यांनीही प्रशंसा केली आहे.

हेही वाचा - त्रिपुरारी पौर्णिमेनिमित्त वाईच्या कृष्णा घाटावर दीपोत्सव