भंडारा - दुचाकीची चावी देण्याच्या वादातून मुलाने वडिलांच्या डोक्यात काठीने घाव घालून हत्या केल्याची धक्कादायक घटना घडली आहे. जिल्ह्याच्या लाखनी तालुक्यातील केसलवाडा (वाघ) येथे गुरुवारी सायंकाळच्या सुमारास ही घटना घडली. वडिलांचा खून केल्यानंतर आरोपी मुलगा थेट पोलीस ठाण्यात हजर झाला. ताराचंद पिसाराम टिचकुले (वय 52) असे या घटनेत मृत झालेल्या वडिलांचे नाव आहे. तर लोकेश ताराचंद टिचकुले (वय 21) असे आरोपी मुलाचे नाव आहे.
ताराचंद आणि त्यांचा मुलगा लोकेश यांच्यामध्ये नेहमी काही ना काही कारणावरून वाद होत होते. गुरुवारी दुपारी लोकेश शेतातून घरी आल्यानंतर त्याने येताच वडील ताराचंद यांना दुचाकीची चावी मागितली. मात्र, वडिलांनी चावी देण्यास नकार देताच त्यांच्यात वाद झाला. या वादात वडिलांनी लोकेशला अंगणात पडलेल्या काठीने मारहाण सुरू केली. त्यामुळे संतापलेल्या लोकेशने त्याच काठीने वडिलांच्या डोक्यावर जोरदार प्रहार केला. डोक्याला जबर मार लागल्यामुळे काही क्षणातच ताराचंद रक्ताच्या थारोळ्यात खाली कोसळले. काठीचा आघात एवढा जोरदार होता की, यात ताराचंद यांचा जागीच मृत्यू झाला.
हेही वाचा - भंडाऱ्यात नागरिकांनी अशोक लेलँड कंपनीविरुद्ध केले टोमॅटो फेको आंदोलन केले
दरम्यान, ताराचंद हे अल्पभूधारक शेतकरी होते. त्यांना दोन मुले असून लोकेश हा त्यांचा लहान मुलगा आहे. लोकेश नेहमी वडिलांसोबत काही ना काही कारणाने वाद घालत असे. या घटनेची माहिती मिळताच गावातील नागरिकांनी घटनास्थळी धाव घेतली. या प्रकरणी मोठा मुलगा जितेंद्र याने लाखनी पोलीस ठाण्यात तक्रार दाखल केली. यावरून पोलिसांनी लोकेश विरोधात खुनाचा गुन्हा दाखल केला असून पोलीस निरीक्षक पुढील तपास करीत आहेत.
