मुंबई - राज्यातील विविध जिल्ह्यातील कारागृहात कोरोनाचा प्रादुर्भाव टाळण्यासाठी कारागृहात येणाऱ्या नवीन कैद्यांना जुन्या कैद्यांपासून दूर ठेवले जाते. नवीन येणाऱ्या कैद्यांसाठी कारागृहाच्या बाहेर क्वारंटाईन रूम बनविले जात आहेत. कारागृह प्रशासनाने बंदिवानांची विशेष काळजी घेण्याचे आदेश राज्यातील सर्वच कारागृह अधीक्षकांना दिले आहेत.
कोरोनाचा धसका; अकोल्यात कैदी देईनात प्रकृती खराब झाल्याची कारणे!
अकोला कारागृहातून बाहेर पडण्यासाठी बंदिवान विविध कारणे देत होते. त्यामध्ये मुख्य कारण प्रकृती अस्वस्थ झाल्याचे होते. त्यामुळे त्यांच्यावर शासकीय वैद्यकीय महाविद्यालयात उपचार करण्यात येत होते. कोरोना रुग्णांवर याच ठिकाणी उपचार सुरू आहेत. म्हणूनच की काय, कोरोनाच्या काळात बंदिवानांची प्रकृती बिघडलेली नाही. संचारबंदी लागू झाल्यापासून एकही बंदिवान हा प्रकृती खराब असल्याचे कारण सांगून उपचारासाठी रुग्णालयात दाखल झालेला नसल्याची माहिती सूत्रांनी दिली आहे. या बंदिवानाना कोरोनाची लागण होऊ नये म्हणून सोशल डिस्टन्सींगचे काटेकोर पालन केले जात आहे.
अकोला जिल्हा मध्यवर्ती कारागृहात 695 बंदिवान ठेवण्याची क्षमता आहे. सध्या याठिकाणी 375 बंदिवान आहेत. खुले महिला कारागृहही या परिसरात आहे. कोरोना विषाणूचा संसर्ग राज्यातील काही कारागृहांमधील बंदिवानांना झाला आहे. या पार्श्वभूमीवर बंदिवानांची विशेष काळजी घेण्याचे आदेश राज्यातील सर्वच कारागृह अधीक्षकांना दिले आहेत. त्यासोबतच कारागृहामध्ये बंदिवानांची संख्या वाढू नये, म्हणून विशेष खबरदारी घेतली जात आहे. कारागृह प्रशासनाकडून बंदिवानांच्या तोंडावर मास्क, त्यांच्यासाठी वेळोवेळी हात धुण्यासाठी केलेली व्यवस्था, सॅनिटाझरची व्यवस्था केली आहे. विशेष म्हणजे, या बंदिवानाच्या जेवणाचीही काळजी घेतली जात आहे. कारागृहात असलेल्या बॅरेकमध्ये सोशल डिस्टन्सींगचे पालन करत त्यामधील बंदिवानाना दुसऱ्या बॅरेकमध्ये हलवण्यात आले आहे.
भंडारा मध्यवर्ती कारागृहाबाहेर नवीन कैद्यांसाठी अलगीकरण कक्ष
भंडारा जिल्हा मध्यवर्ती कारागृहात गेल्या १० दिवसात १४ नवीन कैदी आले असून त्यांची वैद्यकीय तपासणी करून त्यांना वेगळ्या बॅरेकमध्ये क्वारंटाईन केले गेले आहे. या असून लवकरच या सर्व कैद्यांना तिथेच क्वारंटाईन केले जाणार असल्याचे कारागृह अधीक्षकांनी सांगितले.
भंडारा आणि गोंदिया जिल्हा मिळून भंडारा शहरात जिल्हा मध्यवर्ती कारागृह आहे. लॉकडाऊनच्या गेल्या दीड महिन्यात एकही नवीन कैदी कारागृहात आला नव्हता. मात्र गेल्या १० दिवसात १४ नवीन कैदी आले आहेत. त्यातच भंडारा आणि गोंदिया जिल्ह्यात कोरोनाच्या रुग्णांची संख्यासुद्धा वाढत आहेत. त्यामुळे नवीन येणाऱ्या सर्व कैद्यांना जुन्या कैद्यांपासून दूर ठेवले जात आहे.
आलेल्या नवीन कैद्यांना सुरुवातीला रुग्णालयात नेऊन त्यांची वैद्यकीय तपासणी केली जाते. त्यानंतर या कैद्यांना कारागृहात वेगळ्या बॅरेकमध्ये ठेवले जाते. क्वारंटाईन असलेल्या कैद्यांना बॅरेकच्या बाहेर येण्याची परवानगी नसते.
सध्या गोंदियात ४० आणि भंडारा जिल्ह्यात 9 कोरोना रुग्ण आहेत. कोरोनाचा वाढता प्रादुर्भाव बघता येणाऱ्या प्रत्येक नवीन कैद्यांना आता सरळ कारागृहात न आणता त्यांच्यासाठी बाहेर ठिकाणी क्वारंटाईन कक्षाची व्यवस्था करण्यासाठी जिल्हा कारागृह अधीक्षक साळी यांनी जिल्हाधिकाऱ्यांना विनंती केली होती. त्यानंतर मागासवर्गीय ‘मुलींचे शासकीय वसतिगृह’ येथे या नवीन कैद्यांसाठी क्वारंटाईन सेंटर तयार करण्यात आले आहे.
आवश्यकतेनुसार यामध्ये बदल केले जात आहे. लवकरच तिथे येणाऱ्या नवीन कैद्यांची पूर्ण सुरक्षेसह व्यवस्था केली जाईल. नवीन आलेल्या या कैद्यांना वैद्यकीय तपासणी करून 14 दिवस नवीन क्वारंटाईन सेंटरमध्ये ठेवले जाईल. 14 दिवसानंतर त्यांचे स्वॅब घेऊन तपासणीसाठी पाठविले जाईल. त्या स्वॅबचा अहवाल निगेटिव्ह आल्यानंतरच या कैद्यांना कारागृहात ठेवले जाणार असल्याची माहिती कारागृह अधीक्षक राजकुमार साळी यांनी दिली आहे.
