बीड - बीड जिल्हा परिषदेमध्ये सत्ता स्थापन करण्यासाठी शिवसंग्रामने भाजपला मदत केली. मात्र, बीड जिल्ह्याच्या स्थानिक राजकारणात आम्हाला संपवण्याचा बीडच्या पालकमंत्री पंकजा मुंडे यांनी जाणीवपूर्वक प्रयत्न केला. त्यामुळे या लोकसभा निवडणुकीमध्ये शिवसंग्राम प्रस्थापितांच्या विरोधात बंड करणार आहे. शिवसंग्राम बीडमध्ये भाजपच्या उमेदवाराला मदत करणार नाही. तर शेतकरी पुत्र असलेल्या राष्ट्रवादी काँग्रेसचे उमेदवार संजय सोनवणे यांच्या पाठीशी उभी राहणार असल्याचे शिवसंग्रामचे संस्थापक आमदार विनायक मेटे यांनी स्पष्ट केले आहे.
यावेळी मेटे म्हणाले, बीड जिल्ह्यात शिवसंग्रामच्या कार्यकर्त्यांना सातत्याने दाबण्याचा प्रयत्न झाला. आम्ही प्रामाणिकपणे सहकार्य करत असतानादेखील पालकमंत्र्यांनी वेळोवेळी आमच्या विरोधात भूमिका घेतली. असे असतानाही आम्ही स्थानिक स्वराज्य संस्थांमध्ये सत्ता मिळवण्यासाठी भाजपला व पंकजा मुंडे यांना सहकार्य केलेले आहे. मदत करूनदेखील आम्हाला निधी मिळू न देण्याचे पाप पालकमंत्री पंकजा मुंडे यांनी केले असल्याचा आरोप यावेळी मेटेंनी केला.
पंकजा मुंडे व त्यांच्या कार्यकर्त्यांनी प्रामाणिकपणे माझे काम केले असते. तर, मी आज बीड विधानसभा मतदारसंघाचा आमदार असतो. मात्र, त्यावेळी भाजपच्या याच जिल्हाध्यक्षांनी व पंकजा मुंडेनी माझ्याशी गद्दारी केली, असेही मेटे यावेळी म्हणाले.
यावेळी शिवसंग्रामच्या कार्यकर्त्यांनी मेळाव्यात बजरंग बली की जय, अशा घोषणा देऊन राष्ट्रवादी काँग्रेसच्या उमेदवार बजरंग सोनवणे यांच्या पाठीशी शिवसंग्राम असल्याचे स्पस्ट केले. याप्रसंगी शिवसंग्रामचे जिल्हाध्यक्ष प्रभाकर कोलांगडे , जिल्हा परिषद सदस्य भारत काळे, सुहास पाटील, मनोज जाधव, गणेश बजगुडे, ज्ञानेश्वर कोकाटे , सुभाष सपकाळ नितीन लोढा, अनिल घुमरे, लक्ष्मण ढवळे, सुदर्शन धांडे, दत्ता जाधव, कैलास माने, राजेंद्र आमटे, आनंद जाधव आदींची उपस्थिती होती.
