बीड - बीड विधानसभा मतदारसंघात लक्षवेधी लढत होत आहे. येथे चुलते विरुद्ध पुतण्या, अशी लढत रंगणार आहे. बीड विधानसभा मतदारसंघातील राष्ट्रवादी काँग्रेसचे उमेदवार संदीप रवींद्र क्षीरसागर हे शुक्रवार (दि.4 ऑक्टोबर) रोजी उमेदवारी अर्ज दाखल करणार आहेत. डॉ. बाबासाहेब आंबेडकर यांच्या पुतळ्यास अभिवादन करून सकाळी 10 वाजता रॅलीस सुरुवात होणार असून बागलाने इस्टेट येथे दुपारी 3 वा. जाहीर सभा होणार आहे. यावेळी राष्ट्रवादी काँग्रेसचे व मित्र पक्षाचे सर्व मान्यवर उपस्थित राहणार असून सर्वांनी मोठ्या संख्येने सहभागी होण्याचे आवाहन राष्ट्रवादी काँग्रेसचे तालुकाध्यक्ष गंगाधर घुमरे, पालिकेचे गटनेते फारूक पटेल, शहराध्यक्ष बाळासाहेब गुजर यांनी केले आहे.
हेही वाचा - नियती कोणाला माफ करत नसते; जयदत्त क्षीरसागरांचा राष्ट्रवादीवर हल्लाबोल
राष्ट्रवादीचे सर्वेसर्वा खासदार शरद पवार यांनी बीड विधानसभेसाठी राष्ट्रवादी काँग्रेस पक्षाकडून महिनाभरापूर्वीच संदीप क्षीरसागर यांना तयारीला लागण्याचे आदेश दिले होते. संदीप क्षीरसागर यांनी सहकाऱ्यांना सोबत घेत शहरातील घरोघरी जात, ग्रामीण भागात वाडी-वस्ती तांड्यावर पोहचत जनसामान्यांकडे मतदानरुपी आशीर्वाद मागितले. बीडमध्ये गेल्या पंचवीस वर्षांपासून पाहिजे तसा विकास झाला नसल्याने परिवर्तन घडविण्यासाठी आणि बीडचा विकास करण्यासाठी ‘बीडकरांना बदल हवा, संदीप भैय्या पर्याय नवा’ हा संदेश घेऊन राष्ट्रवादी घरा-घरात पोहचली आहे.
हेही वाचा - अप्रत्यक्ष भाजपला मदत करणारे प्रत्यक्ष मदतीसाठी भाजपात गेले -धनंजय मुंडे
4 ऑक्टोबर रोजी राष्ट्रवादी काँग्रेस व मित्र पक्षांकडून संदीप क्षीरसागर उमेदवारी अर्ज दाखल करणार आहेत. घटनेचे शिल्पकार भारतरत्न डॉ.बाबासाहेब आंबेडकर यांच्या पुतळ्यास अभिवादन करून राष्ट्रवादी काँग्रेसच्या रॅलीस सुरुवात होणार आहे. त्यापूर्वी शहरातील सर्व महापुरुषांच्या पुतळ्याला पुष्पहार घालून अभिवादन केले जाणार आहे. ही रॅली डॉ. बाबासाहेब आंबेडकर यांच्या पुतळ्यापासून माळीवेस-बलभिम चौक-कारंजा रोड, छ. शिवाजी महाराज यांच्या पुतळ्यास अभिवादन करुन तहसीलमार्गे माने कॉम्प्लेक्स पुढे बागलाने इस्टेट येथे जाहीर सभेत रूपांतरीत होणार आहे.
