बीड - विधानसभा निवडणुकीसाठी प्रचाराला सुरुवात झाली आहे. अनेक ठिकाणी रंगतदार लढती होत आहेत. यामध्येच बीड विधानसभा मतदारसंघातील काका - पुतण्यात होत असलेली लढत चर्चेचा विषय ठरत आहे. शुक्रवारी संदीप क्षीरसागर यांनी आपले काका जयदत्त क्षीरसागर यांच्या विरोधात राष्ट्रवादीकडून उमेदवारी अर्ज दाखल केला. यावेळी बोलताना त्यांनी जयदत्त क्षीरसागर यांच्यावर जोरदार निशाणा साधला.
बीड विधानसभा मतदारसंघातील लढत ही जनशक्ती विरुद्ध धनशक्ती अशी आहे. मी व माझे कार्यकर्ते कायम जनतेच्या सेवेसाठी रस्त्यावर असतो. ज्या माझ्या काकाने माझ्यावर अन्याय केला त्यांच्या विरोधात मी राष्ट्रवादी काँग्रेसच्या तिकिटावर उभा आहे. जनतेने माझ्या पाठीशी उभे राहून आशिर्वाद द्यावेत, अशी साद संदीप क्षीरसागर यांनी उपस्थित जनतेला घातली.
बीड शहराची झालेली अवस्था जनता पाहत आहे. तुम्ही विकासाच्या गप्पा मारता. 2012 मधली कामे 2017 मध्ये झाली. आम्ही शहराचे राखणदार म्हणून काम करत आहोत. पंचायत समिती, जिल्हा परिषदमध्ये काम करत असताना लोकांचे हित आम्ही पाहिले. आमच्यावर तुम्ही भ्रष्टाचाराचा आरोप केले, मात्र, एकही आरोप तुम्ही सिध्द करु शकला नसल्याचे संदीप क्षीरसागर म्हणाले. तुमच्याकडे बोलायला काही नसल्यामुळे तुम्ही चारित्र्यावर येता. यापुढे जर चारित्र्याची भाषा कराल तर पत्रकारांच्या परवानगीने आमने-सामने बसू तुमच्या चारित्र्याच्या अनेक गोष्टी आमच्याकडे आहेत. तेही पुराव्यानिशी. कोणत्याही प्रयोगशाळेत पाठवा खोटे निघाले तर माघार घेईल असेही संदीप क्षीरसागर म्हणाले.
