बीड - संदीप क्षीरसागर सध्या जिल्हा परिषद सदस्य आहेत. आता लवकरच ते बीड विधानसभा मतदारसंघाचे आमदार असतील, असे सुतोवाच विधान परिषदेचे विरोधी पक्षनेते धनंजय मुंडे यांनी केले आहे. इतकेच नाही तर बीड विधानसभा मतदारसंघातील उमेदवारी कोणाला याचे संकेत धनंजय मुंडे यांनी मंगळवारी शिवजयंतीच्या निमित्ताने दिले. बीड विधानसभा निवडणुकीसाठी काका आमदार जयदत्त क्षीरसागर व पुतणे संदीप शिरसागर यांच्यात रस्सीखेच सुरू असल्याने धनंजय मुंडे यांच्या वक्तव्याने बीड राजकारणाला वेगळे वळण लागण्याची शक्यता आहे.
धनंजय मुंडे यांनी संदीप क्षीरसागर यांना विधानसभेच्या उमेदवारीचा दिलेला शब्द पाळणार का? असा प्रश्न यानिमित्ताने उपस्थित झाला आहे. सार्वजनिक शिवजयंती उत्सवाला मंगळवारी विरोधी पक्षनेते धनंजय मुंडे यांची विशेष उपस्थिती होती. राष्ट्रवादी काँग्रेसचे युवा नेते संदीप क्षीरसागर यांनी हा शिवजयंती उत्सव आयोजित केला होता. यावेळी विरोधी पक्षनेते धनंजय मुंडे यांनी जयंती उत्सवाला भेट देऊन छत्रपती शिवाजी महाराजांच्या प्रतिमेला पुष्पहार अर्पण करून वंदन केले.
यावेळी बोलताना धनंजय मुंडे म्हणाले, की पुढच्या वर्षी जेव्हा छत्रपती शिवाजी महाराजांची जयंती साजरी कराल तेव्हा संदीप शिरसागर हे जिल्हा परिषद सदस्य नसतील, तर ते बीड विधानसभा मतदारसंघाचे आमदार असतील, असे सूतोवाच धनंजय मुंडे यांनी केले. बीड विधानसभा मतदारसंघातील उमेदवारीचा दिलेला शब्द मुंडे पाळतील का? हे पाहणे औत्सुक्याचे ठरणार आहे.
बीड विधानसभा मतदारसंघात सध्या राष्ट्रवादी काँग्रेसचे आमदार जयदत्त क्षीरसागर आहेत. आमदार क्षीरसागर यांचे पुतणे संदीप क्षीरसागर आता राष्ट्रवादीकडून बीड विधानसभा मतदारसंघाची उमेदवारी मागत आहेत. २३ फेब्रुवारी रोजी शरद पवार यांच्या उपस्थितीत परळी येथे सभा होणार आहे. या सभेला जर जयदत्त क्षीरसागर नाही आले, तर बीड विधानसभा मतदारसंघाची उमेदवारी कदाचित संदीप क्षीरसागर यांना निश्चित होऊ शकते, असे संकेत असल्याचे राजकीय जाणकारांचे मत आहे.
