बीड- बारा ज्योतिर्लिंगापैकी एक ज्योतिर्लिंग बीड जिल्ह्यातील परळी येथे आहे. प्रभू वैजनाथच्या दर्शनासाठी विविध राज्यातून भाविक श्रावण सोमवारनिमित्त परळीमध्ये दाखल झाले आहेत. मध्यरात्री बारानंतर भाविकांनी प्रभू वैजनाथाच्या दर्शनासाठी मंदिर परिसरात गर्दी केली असल्याचे चित्र पाहायला मिळाले. शांततेत व वेळेत दर्शन व्हावे यासाठी वेगवेगळ्या तीन रांगा करण्यात आल्या असल्याचे मंदिर संस्थानचे सचिव राजेश देशमुख यांनी सांगितले. यावेळी हर हर महादेवाच्या जय घोषाने संपूर्ण परळी शहर दुमदुमले होते.
श्रावण सोमवार निमित्त बीड जिल्ह्यातील सेवालये भाविकांनी गजबजली आहेत. प्रभू वैजनाथाच्या दर्शनासाठी विविध राज्यांमधून भाविकांची मंदिर परिसरात मांदियाळी पाहायला मिळाली. बेलपत्र व पुष्पहार अर्पण करून प्रभू वैजनाथाच्या दर्शनाचा लाभ भाविकांनी घेतला. वैजनाथ मंदिराच्या परिसरात आकर्षक रांगोळ्या भाविकांचे लक्ष वेधून घेत होत्या. सोमवारी पहाटे चारच्या नंतर मंदिर परिसरात भाविकांची गर्दी वाढली. कर्नाटक आंध्र प्रदेश, गुजरात, तामिळनाडू यासह इतर विविध राज्यांमधून भाविक प्रभू वैजनाथाच्या दर्शनासाठी परळीमध्ये दाखल झाले होते. श्रावण महिन्यातील पहिल्याच सोमवारी हजारो भाविकांनी शंकराचे मनोभावे दर्शन घेतले.
शहरात सर्वत्र आनंदी वातावरण-
श्रावण सोमवारच्या निमित्ताने पहाटे चार पासूनच परळी शहरातील रस्ते भाविकांनी गजबजले होते. सगळीकडे हर हर महादेवचा जयघोष ऐकायला येत होता. भाविक मोठ्या मनोभावाने प्रभु वैजनाथाच्या दर्शनासाठी मंदिराकडे प्रस्थान करत असल्याचे चित्र परळी शहर व परिसरात पाहायला मिळाले. मंदिर संस्थांच्या पदाधिकाऱ्यांनी भाविकांच्या दर्शनाबरोबरच वाहने पार्किंग करण्याची व्यवस्था देखील केलेली आहे. याशिवाय सीसीटीव्ही देखील बसवले आहेत. काही अनुचित प्रकार घडू नये यासाठी तगडा पोलिस बंदोबस्त मंदिर परिसरात ठेवण्यात आला आहे. एकंदरीत श्रावण महोत्सवावर मंदिर समितीचे लक्ष असल्याचे संस्थानचे सचिव राजेश देशमुख यांनी सांगितले.
