बीड - जिल्ह्यातील माजलगाव येथील नगरपालिकेत झालेल्या 4 कोटी 13 लाख रुपयांच्या अपहार प्रकरणात नगराध्यक्ष सहाल चाऊस याला न्यायालयाने 8 जुलै पर्यंत पोलीस कोठडी सुनावली आहे. चाऊस यांचा अपहार प्रकरणात आरोपी म्हणून समावेश करण्यात आला आहे.
अपहार प्रकरणातील तत्कालीन मुख्याधिकारी बी. सी. गावित हे अद्याप फरार आहेत. लक्ष्मण राठोड व हरिकल्याण येलगट्टे या दोन मुख्याधिकाऱ्यांना जामीन मिळाला आहे. लेखापाल कैलास रांजवन व सूर्यकांत सूर्यवंशी यांनाही अंतरिम जामीन मिळालेला आहे. या प्रकरणात अशोक कुलकर्णी वांगीकर यांना देखील पूर्वीच अटक झालेली असून दुसरे लेखापाल आनंद हजारे हे देखील अद्याप फरार आहेत.
माजलगाव नगरपालिकेमध्ये 1 कोटी 44 लाख रुपयांच्या भ्रष्टाचार प्रकरणी व 4 कोटी 13 लाख रुपयांच्या अपहार प्रकरणी डिसेंबर महिन्यात माजलगाव शहर पोलिसात गुन्हे दाखल करण्यात आले होते. यात तीन मुख्याधिकारी, लेखापाल यांचा समावेश होता.
या अपहार प्रकरणात तपासाअंती आरोपी म्हणून चाऊस यांचे नाव समोर आल्याने त्यांना येथील प्रथमवर्ग न्यायाधीश पी.ए. वाघमारे यांच्या न्यायालयासमोर हजर केले गेले. यावेळी न्यायालयाने त्यांना पाच दिवसांची म्हणजेच 8 जुलै पर्यंत पोलीस कोठडी सुनावली आहे. या प्रकरणी सरकारी वकील म्हणून ॲड. प्रताप माने यांनी काम पाहिले तर तपास अधिकारी म्हणून विजय लगड यांनी काम पाहिले.
