बीड - वर्षभराच्या प्रतीक्षेनंतर अखेर 1 मार्चपासून राज्यभरातील सर्वसामान्य नागरिकांना कोरोनाची लस देण्यात येणार आहे. जिल्ह्यातही एकूण दहा शासकीय केंद्रांवरून सर्वसामान्य नागरिकांना कोरोनाची लस मोफत देण्यात येणार असल्याचे आरोग्य विभागाचे डीआयओ संजय कदम यांनी सांगितले. आधी कोरोनाच्या काळात फ्रन्ट लाईनवर काम केलेल्या विविध विभागांतील अधिकारी, कर्मचाऱ्यांना लस दिली. आता वयोवृद्ध नागरिकांना पहिल्या टप्प्यात प्राधान्य देण्यात येणार आहे.
मागील वर्षभर कोरोनाची लस कधी येणार अशी चर्चा होत होती. अखेर प्रत्यक्ष सर्वसामान्य नागरिकांना लस देण्याच्या मोहिमेला 1 मार्च म्हणजेच सोमवारपासून सुरूवात केली जाणार आहे. त्या दृष्टीने बीड जिल्हा आरोग्य विभागाने संपूर्ण तयारी केली आहे. जिल्ह्यात एकूण 11 केंद्रांवरून लसीकरण केले जाणार आहे. या लसीकरणाच्या बाबत सांगताना लसीकरण मोहिमेचे समन्वयक संजय कदम म्हणाले की, शासकीय रुग्णालयाअंतर्गत एका लसीकरण केंद्रावरून एका दिवसाला चारशे व्यक्तींना लस टोचण्याची व्यवस्था केलेली आहे. विशेष म्हणजे जिल्हा रुग्णालयाच्या सर्व केंद्रांवरून नागरिकांचे मोफत लसीकरण केले जाणार आहे. याशिवाय सर्वात आधी वयोवृद्ध नागरिकांना लस दिली जाणार असल्याचे ते म्हणाले.
खासगीत अडीचशे रुपयांना एक डोस -
शासकीय रुग्णालयात सर्वसामान्य नागरिकांना कोरोनाची लस मोफत देण्यात येणार आहे. मात्र, जर खाजगी रुग्णालयात आपण लस घेत असाल तर शंभर रुपये रजिस्ट्रेशन शुल्क आणि दीडशे रुपये लसीकरण चार्ज म्हणजेच खाजगी रुग्णालयात एकूण अडीचशे रुपयांना कोरोना लसीचा डोस नागरिकांना मिळणार आहे.
हेही वाचा - CORONA LIVE UPDATE : शुक्रवारी राज्यात 8 हजारापेक्षा अधिक रुग्ण, तर 48 रुग्णांचा मृत्यू
'अशी' करावी लागणार ऑनलाईन नोंदणी -
शासनाने तयार केलेल्या कोविन पोर्टलवर विशिष्ट नंबरवरून नोंदणी करायची आहे. या पोर्टलमध्ये अजून काही बदल होत आहेत. हे बदल रविवारी संध्याकाळपर्यंत पूर्ण होणार आहेत. एका मोबाईलवरून कुटुंबातील चार व्यक्तींची लसीकरणासाठी नोंदणी करता येऊ शकणार आहे. कोविन पोर्टलवर नोंदणी करताना मोबाईलवर एक ओटीपी पाठविला जाईल. ओटीपी क्रमांक आल्यानंतर नोंदणीचे ॲप ओपन होईल व आपली नोंदणी पूर्ण होईल.
स्पॉट नोंदणीची देखील व्यवस्था -
जर काही व्यक्तींना ऑनलाईन नोंदणीमध्ये अडचण आली असेल तर लसीकरण केंद्राच्या ठिकाणी स्पॉट नोंदणीचीही विशेष व्यवस्था आरोग्य विभागाच्या वतीने करण्यात आलेली आहे. स्पॉट नोंदणी करताना त्या व्यक्तीचे ओळखपत्र आवश्यक आहे. ओळख पत्रामध्ये आधार कार्ड, ड्रायव्हिंग लायसन, अथवा इतर शासनाकडून प्रमाणित असलेले कुठलेही ओळखपत्र असणे बंधनकारक आहे.
