बीड - दुष्काळामुळे जनावरांच्या चाऱ्याचा प्रश्न बीड जिल्ह्यात निर्माण होत आहे. यासाठी अनेक जणांनी चारा छावण्यांचे प्रस्ताव शासनाकडे दिले होते. त्यानुसार ७८२ छावण्या मंजूर झाल्या होत्या. पण, त्यातील केवळ ३२० छावण्या सुरू झाल्या आहेत. मान्यता मिळूनही ४६२ छावण्या अद्याप बंद आहेत. तेव्हा या छावण्या सुरू न केल्यास त्यांची मान्यता रद्द करण्यात येईल, असा इशारा बीडचे जिल्हाधिकारी आस्तिककुमार पांडे यांनी दिला आहे.
चारा छावणीच्या मंजुरीसाठी जिल्हा प्रशासनाकडे अनेक चारा छावणी चालकांनी चकरा मारल्या. जिल्हाधिकाऱ्यांनी छावणीला मंजुरी देखील दिली. मात्र, मंजुरी मिळून सात दिवसांहून अधिक काळ लोटला, तरी देखील बहुतांश चारा छावण्या सुरूच झाल्या नाहीत. हे वास्तव चित्र बीड जिल्ह्यात आहे. ७८२ पैकी केवळ ३२० चारा छावण्या सुरू झाल्या असून, उर्वरित ४६२ चारा छावण्या अद्यापही सुरू झालेल्या नाहीत. दुष्काळाचे प्रचंड दुर्भिक्ष असल्याने जनावरांना चारा मिळावा हा उद्देश छावण्यांचा असतो. पण, त्याच सुरू न झाल्यास या उद्देशालाच हरताळ फासला जाईल.
बीड जिल्ह्यात साडेसात ते आठ लाख जनावरांची संख्या आहे. दुष्काळी परिस्थितीत जनावरांची संख्या लक्षात घेता, सर्व छावण्या वेळेत सुरू होणे जिल्हा प्रशासनाला अपेक्षित होते. मात्र, अर्ध्यापेक्षाही कमी चारा छावण्या सुरू झाल्या आहेत. मंजुरीची गरबड करणाऱ्या छावणीत चारा छावणी चालकांनी मंजुरी मिळाल्यानंतर सात दिवसात चारा छावणी सुरु करणे अपेक्षित आहे. मात्र, अद्यापही सुरू न झालेल्या चारा छावण्यांना शेवटची नोटीस बजावून सुरू करण्याबाबत सांगण्यात येईल. तरीदेखील ज्या चारा छावण्या बंद राहतील त्यांची मान्यता रद्द केली जाईल, अशी माहिती जिल्हाधिकारी पांडे यांनी दिली.
