बीड - जिल्हा परिषदेच्या विविध विभागांच्या सभापती पदांच्या निवडी शुक्रवारी झाल्या. महाविकास आघाडीतील जयसिंह सोळंके, सविता मस्के, कल्याण अबुज आणि यशोदा जाधव यांची बिनविरोध निवड झाली. सभापतीपदांच्या निवड प्रक्रियेमधून भाजपला माघार घेण्याची नामुष्की ओढावली.
समाज कल्याण सभापती म्हणून कल्याण अबुज तर महिला बाल-कल्याण सभापती म्हणून यशोदा बाबुराव जाधव यांची निवड झाली. जयसिंह सोळंके आणि सविता मस्के यांची विषय समितीच्या सभापती पदी निवड झाली.
हेही वाचा - शरद पवारांच्या दिल्लीतील निवासस्थानाची सुरक्षा हटवली, राष्ट्रवादी आक्रमक
बीड जिल्हा परिषदेच्या सभापतिपदाच्या निवडीमध्ये राष्ट्रवादी काँग्रेस काँग्रेस आणि शिवसेनेच्या पदाधिकाऱ्यांमध्ये मोठ्या प्रमाणात खलबते झाली. शिवसेनेचे माजी राज्यमंत्री बदामराव पंडित यांच्या गटातील यशोदा जाधव यांची सभापतीपदी निवड करून युधाजित पंडित यांना डावलले आहे. राष्ट्रवादी काँग्रेसचे माजी आमदार अमरसिंह पंडित यांच्या खेळी मुळेच पंडित यांना बाजूला केल्याची चर्चा आहे.
बीड जिल्हा परिषदेच्या अध्यक्ष आणि उपाध्यक्ष पदाच्या निवडणुकीत महाविकास आघाडीने भाजपला धक्का दिला. त्यानंतर विषय समिती सभापतीच्या निवडीकडे संपूर्ण जिल्ह्याचे लक्ष लागले होते. या निवडणुकीत महाविकास आघाडीतच मोठ्या प्रमाणावर स्पर्धा होती. अनेकजण दावेदार असल्याने सभापती निवडीचे मोठे आव्हान महाविकास आघाडीच्या नेत्यांसमोर होते. महाविकास आघाडीतील हा अंतर्गत वाद भाजपला आपल्या पथ्यावर पडेल असे वाटत होते मात्र, तसे घडले नाही. धनंजय मुंडे यांनी स्वतः उपस्थित राहून या निवड प्रक्रियेमध्ये सहभाग नोंदवला होता.
