बीड- आमदार विनायक मेटे यांच्या शिवसंग्रामला जिल्ह्यात पुन्हा एक राजकीय हादरा बसला आहे. शिवसंग्रामच्या तिकिटावर निवडून आलेले नेकनूरचे जिल्हा परिषद सदस्य भारत काळे यांनी शिवसंग्रामला सोडचिठ्ठी देत भाजपमध्ये प्रवेश केला आहे. त्यामुळे आता शिवसंग्रामकडे एकही जिल्हा परिषद सदस्य शिल्लक राहिला नसल्याने एकंदरीत या राजकीय घडामोडीनंतर शिवसंग्रामचे आमदार विनायक मेटे यांच्यासाठी हा मोठा राजकीय धक्का समजला जात आहे.
जिल्ह्याच्या राजकारणात शिवसंग्रामचे विनायक मेटे विरुद्ध मंत्री पंकजा मुंडे यांच्यामध्ये जोरदार संघर्ष सुरू आहे. मागील पंधरा दिवसापूर्वी मुख्यमंत्री 'महाजनादेश' यात्रेच्या निमित्ताने जिल्ह्यात आले होते. त्यावेळी विनायक मेटे व पंकजा मुंडे यांच्यातील गटबाजी उफळून आली होती. विशेष म्हणजे, आमदार विनायक मेटे यांनी काकडहिरा येथे ठेवलेल्या कार्यक्रमादरम्यान मंत्री पंकजा मुंडे यांच्या विरोधात काही घोषणाबाजी झाली होती. या सगळ्या परिस्थितीचा वचपा काढण्यासाठी पंकजा मुंडे यांनी गुरुवारी शिवसंग्रामकडे असलेले जिल्हा परिषद सदस्य भारत काळे यांना भाजपमध्ये प्रवेश देऊन विनायक मेटेंना दणका दिला आहे. मंत्री पंकजा मुंडे यांच्या उपस्थितीत हा प्रवेश झाला.
शिवसंग्रामचे संख्याबळ शुन्यावर
अडीच वर्षांपूर्वी झालेल्या जिल्हा परिषद निवडणुकीत शिवसंग्रामचे ४ सदस्य निवडून आले होते. यापूर्वीच शिवसंग्रामचे तत्कालीन युवक प्रदेशाध्यक्ष राजेंद्र मस्के यांनी शिवसंग्रामला सोडचिठ्ठी दिली होती. राजेंद्र मस्के यांच्या पत्नी जयश्री मस्के या बीड जि.प. च्या उपाध्यक्ष आहेत. मस्केंच्या भाजपशी जवळीक साधण्याच्या निर्णयानंतर आमदार मेटेंनी जिल्हा परिषदेतील भाजपचा पाठिंबा काढण्याची घोषणा केली होती.
मात्र लोकसभा निवडणुकीदरम्यान अशोक लोढा आणि विजयकांत मुंडे या दोन जिल्हा परिषद सदस्यांनी देखिल भाजपात प्रवेश केला होता. आता भारत काळे यांनीही भाजपात प्रवेश केल्याने जिल्हा परिषदेत शिवसंग्रामचे संख्याबळ शुन्यावर आले आहे.
