एचआरसीटी स्कोअर १६ आणि ऑक्सिजन पातळी ६५पर्यंत उतरलेली, तरीही ९५ वर्षीय आजोबांची कोरोनावर मात

अंबाजोगाईमध्ये ९५ वर्षीय आजोबांनी एचआरसीटी स्कोअर १६ आणि ऑक्सिजन पातळी ६५ पर्यंत उतरलेली असताना देखील कोरोनावर मात केली आहे.

अंबाजोगाई - वय ९५ वर्षे.. त्यात कोरोनाची लागण झाली. एचआरसीटी स्कोअर १६ वर गेलेला तर ऑक्सिजन पातळी ६५पर्यंत उतरलेली… काहीही झाले तरी झेपेल तेवढे उपचार करून वडिलांना या आजारातून बाहेर काढायचं यासाठी मुलांनी त्यांना अंबाजोगाईच्या सीएम हॉस्पिटलमध्ये दाखल केले. या हॉस्पिटलमधील तज्ज्ञ डॉक्टरांच्या उपचारानंतर ते ९५ वर्षीय आजोबा अवघ्या सात दिवसात कोरोनावर मात करून घरी गेले.

आवश्यक बाबींनी रुग्णालय सज्ज
कोरोनाच्या दुसऱ्या लाटेत रुग्णांची संख्या प्रचंड वाढली. ही वाढती संख्या शासकीय रुग्णालयांना झेपणारी नसल्याने शासनाने कोरोना उपचाराचे सर्व निकष पूर्ण करणाऱ्या खासगी रुग्णालयांनाही उपचाराची परवानगी देण्यात आली. अंबाजोगाई येथील डॉ. सुहास यादव यांचा शासकीय रुग्णालयातील कोरोना उपचाराचा अनुभव लक्षात घेता त्यांचे सीएम हॉस्पिटल देखील कोविड रुग्णालय म्हणून घोषित करण्यात आले. कोविड आणि नॉन-कोविड रुग्णांची स्वतंत्र व्यवस्था, आयसीयू तसेच ऑक्सिजन बेड आणि तज्ज्ञ स्टाफ या सार्व आवश्यक बाबींनी हे रुग्णालय सज्ज आहे. आजवर अनेक रुग्ण या हॉस्पिटलमधून कोरोनामुक्त होऊन घरी गेले आहेत.