औरंगाबाद - पतीची भेट घेण्यासाठी एका विवाहितेने चक्क सासुरवाडीला रस्त्यावर बसून आंदोलन केल्याचा प्रकार वैजापूर तालुक्यात घडला आहे. प्राजक्ता डहाळे, असे या विवाहितेचे नाव आहे. नवरा अमेरिकेत असून सासुरवाडीचे लोक पतीशी बोलू देत नसल्याने प्राजक्ताला तिच्या आई वाडीलांसह हे आंदोलन करावे लागले.
औरंगाबादच्या प्राजक्ताचा विवाह वैजापूर येथील सचिन उदावंत यांच्याशी झाला. सचिन अमेरिकेत नोकरी करत असल्याने आपली मुलगी विदेशात संसार करणार, अशी अपेक्षा कुटुंबीयांना होती. सचिनच्या वडिलांचे वैजापूर येथे सोन्या चांदीचे दुकान आहे. चांगल्या घरात मुलगी देताना लग्नात काही कमी पडू नये म्हणून प्राजक्ताच्या वडिलांनी औरंगाबादच्या पंचतारांकित हॉटेलमध्ये २ दिवसांचा शाही विवाह सोहळा केला. मात्र, लग्न झाल्यावर सचिनने कधीही प्राजक्ताचा पत्नी म्हणून स्वीकार केला नाही. उलट प्राजक्ताला अमेरिकेत नेऊन त्याने मोलकरणीसारखी वागणूक दिली आणि व्हिसा संपल्यावर तिला भारतात पोहोचवून अमेरिकेला माघारी गेला तो परत आलाच नाही.
इकडे प्राजक्ताच्या सासरच्या मंडळींनीही सून म्हणून स्वीकार केला नाही. तिच्यावर अत्याचार केले, तिला घरातून वेगळे काढले. पती सचिनने तिचा मोबाईल क्रमांक ब्लॉक केला आणि स्वतःचाही मोबाईल क्रमांक बदलला. त्यामुळे प्राजक्ताला त्याच्याशी बोलणे अशक्य झाले. यात सासरची मंडळी पतीशी बोलू देत नसल्याने प्राजक्ता आणि तिच्या आई वडिलांनी सासुरवाडी समोरच आंदोलन केले. घरचा वाद बाहेर काढायचा नव्हता. मात्र, दुसरा पर्याय नसल्याने अखेर आंदोलनाचे हत्यार उपसल्याचे आई वडिलांनी सांगितले.
या आंदोलनानंतर प्राजक्ताच्या सासऱ्यांनी सचिन 12 फेब्रुवारीला परत आल्यानंतर आपण सर्व विषय स्पष्ट करू असे आश्वासन दिले. मात्र, अमेरिकेतून येण्यासाठी एक महिना का लागतो? असा प्रश्न प्राजक्ताच्या आईने उपस्थित करत यात संशय व्यक्त केला. तसेच प्राजक्ताच्या जीवाला धोका असल्याची भीती प्राजक्ताच्या आई वडिलांनी व्यक्त केली.
हेही वाचा - डॉ. बाबासाहेब आंबेडकर मराठवाडा विद्यापीठ; 26 वा नामविस्तार दिन उत्साहात
दरम्यान, लग्नाला दीड वर्ष झाल्यानंतरही अद्याप पत्नी म्हणून स्वीकार न केल्याने प्राजक्ताने आंदोलनाचा मार्ग अवलंबला आहे. मात्र, तिला न्याय देण्याऐवजी सासरची मंडळी जीवे मारण्याची धमकी देत असल्याने प्राजक्ताचे आई वडील भीतीच्या सावटाखाली जगत आहेत. मला माझ्या नवऱ्याशी बोलू द्या, त्याच्याशी संपर्क करून द्या या मागणीसाठी प्राजक्ताने आपल्या आई वडिलांसह इतर नातेवाईकांना घेऊन आंदोलन केले. मात्र न्याय कधी मिळणार याची वाट प्राजक्ता पाहत आहे.
हेही वाचा - वाहतुकीचे नियम पाळा, नाहीतर यमराज सेल्फी काढेल
