औरंगाबाद - पैसे दुप्पट करण्याच्या लालसेला बळी पडलेल्या एका व्यापाऱ्याला चार लाखांना गंडा घालण्यात आला. बुधवारी रात्री साडेआठच्या सुमारास पिशोर नाक्यावर संबंधित घटना घडली. याप्रकरणी शहर पोलीस ठाण्यात गुन्हा दाखल करण्यात आला आहे.
भानुदास काशिनाथ मगर, असे फसवणूक झालेल्या आले व्यापाऱ्याचे नाव आहे. बहिरगाव येथील संदीप पवार हा देखील आलं व्यापारी असल्याने त्याच्याशी ओळख झाली. दहा बारा दिवसांपूर्वी संदीप पवारच्या आईने घरी बोलावून एक लाख रुपये जमा केले, तर पैसे दुप्पट करून देतो, असे सांगणाऱ्या महाराजाचा मोबाइल क्रमांक दिला. त्यानंतर पैसे जमा करू लागले. बुधवारी संध्याकाळी सात ते साडेसात वाजेच्या दरम्यान महाराजांनी अण्णाभाऊ साठे चौकात बोलावले. त्या ठिकाणी महाराजाची भेट झाली.
एक मीटर कोरा कपडा आणि बँकेसमोरील बॅग -
महाराजासोबतच्या अनोळखी व्यक्तीसह मोटारसायकलवर सर्वजण घरी आले. त्याने एक मीटर कोरा कपडा घेण्यास सांगितले. दुकानातून कपडा घेतल्यानंतर त्यावर हळद-कुंकू टाकून ५०० रुपये किंमतीच्या ८०० नोटा बॅगमध्ये भरून मोटारसायकलने पिशोर नाक्यावरील एचडीएफसी बँकेसमोर थांबण्याचे सांगितले. त्याचवेळी फोन आल्याने बोलत असताना मोटारसायकलला अडकवलेली ४ लाखांची बॅग घेऊन महाराज आणि त्यांचा साथीदार चारचाकीतून पिशोर रस्त्यावाटे सुसाट वेगात गेले.
यासंबंधी तक्रार भानुदास मगर याने दिल्यावरून गुन्हा दाखल करण्यात आला आहे. पुढील तपास पोलीस निरीक्षक रामेश्वर रेंगे यांच्या मार्गदर्शनाखाली सहपोलीस निरीक्षक दिलीप तेजनकर करत आहेत.
