औरंगाबाद - शहरातील एटीएम मशीन फोडीच्या घटनेला 24 तास झाले नसताना, आणखी एक एटीएम फोडीची घटना समोर आली आहे. शहरातील पडेगाव परिसरात रस्त्या लगत असलेल्या एसबीआय बँकेचे एटीएम चोरट्यांनी फोडण्याचा प्रयत्न केला. अज्ञात चोरांनी गॅस कटरने एटीएम कापले. मात्र चोरांचा प्रयत्न सफशेल अपयशी ठरल्याने एटीएम मधील रक्कम सुरक्षित राहिली.
शहरातील पडेगाव परिसरात रात्रीच्या सुमारास रस्त्यावर रहदारी कमी असते. याचाच फायदा उठवत चोरट्यांनी एटीएमवर पाळत ठेवून रात्रीच्या सुमारास एटीएम फोडण्याचा प्रयत्न केला. चोरांनी गॅस कटरने एटीएम कापून रक्कम पळवण्याचा प्रयत्न होता. मात्र, चोरट्यांचा प्रयत्न फसल्याने मशीन मधली रक्कम सुरक्षित राहिली. सलग दुसऱ्या दिवशी चोरीच्या घटनेने पुन्हा एकदा एसबीआय बँकेचे एटीएम चोरट्यांचा रडारवर असल्याचे समोर आले आहे.
याआधी शनिवारी पहाटे बीड महामार्गावर असलेले एसबीआय बँकेचे एटीएम चोरट्यांनी पळवले होते. या मशीनमध्ये जवळपास 25 लाखांची रक्कम होती. सीसीटीव्ही कॅमेऱ्यावर काळी शाई लावून ही चोरी करण्यात आली होती. ही घटना ताजी असतानाच 24 तासात शहरात अशीच दुसरी घटना घडली.
