पाचोड येथील ट्रामा केयर सेंटरमध्ये लवकरच सुरू होणार कोविड-19 हेल्थ सेंटर

औरंगाबाद शहरात कोरोनाबाधितांची संख्या दिवसेंदिवस वाढतच आहे. रुग्णांची वाढती संख्या बघता विविध ठिकाणी विलगीकरण कक्ष निर्माण करण्याच्या तयारीला वेग आला आहे. पाचोड ग्रामीण रुग्णालयात येथे विलगीकरण कक्षाची निर्मिती करण्यात येत आहे. उपविभागीय जिल्हाधिकारी स्वप्नील मोरे यांनी नव्याने निर्माण होणाऱ्या 30 खाटांच्या कोविड हेल्थ सेंटरची पाहणी केली.

औरंगाबाद - कोरोना विषाणूच्या पार्श्वभूमीवर पैठण-फुलंब्रीचे उपविभागीय जिल्हाधिकारी स्वप्नील मोरे यांनी पैठणच्या पाचोड परिसरातील परिस्थितीचा आढावा घेतला. पाचोड ग्रामीण रुग्णालय ट्रामा केयर सेंटर येथे नव्याने तयार करण्यात आलेल्या कोविड-19 हेल्थ सेंटर, चेक पोस्ट आणि शासकीय गोदामाला त्यांनी भेट दिली.

औरंगाबाद शहरात कोरोनाबाधितांची संख्या दिवसेंदिवस वाढतच आहे. रुग्णांची वाढती संख्या बघता विविध ठिकाणी विलगीकरण कक्ष निर्माण करण्याच्या तयारीला वेग आला आहे. पाचोड ग्रामीण रुग्णालयात येथे विलगीकरण कक्षाची निर्मिती करण्यात येत आहे. उपविभागीय जिल्हाधिकारी स्वप्नील मोरे यांनी नव्याने निर्माण होणाऱ्या 30 खाटांच्या कोविड हेल्थ सेंटरची पाहणी केली. त्यासाठी लागणारी साधन सामुग्री उपलब्ध करून देण्याची हमी मोरे यांनी दिली.

या वेळी तालुका आरोग्य अधिकारी डॉ. विजयकुमार वाघ, वैद्यकीय अधीक्षक डॉ. सुधीर पोहरेगावकर, डॉ. बाबासाहेब घुगे, डॉ. राहुल दवणे, डॉ. रोहित जैन, डॉ. सोनाली गोंडगे हे उपस्थित होते.

धुळे-सोलापूर राष्ट्रीय महामार्गावरील मुरमा फाटा येथील चेक पोस्टलाही मोरे यांनी भेट दिली. तेथील पोलीस कर्मचाऱ्यांशी संवाद साधला. मालवाहतूक करणाऱ्या वाहनांना अडवू नये, अशा सूचनाही दिल्या. त्यानंतर स्वप्नील मोरे यांनी पाचोड येथील शासकीय गोदामातील धान्य साठ्याचा आढावा घेतला. नागरिकांना रेशन देताना कुठलीही अडवणूक होणार नाही याची दक्षता घेण्याची सूचना गोदाम कर्मचाऱयांना मोरे यांनी दिल्या.