औरंगाबाद- शहरातील औरंगाबाद पश्चिम हा मतदारसंघ अनुसूचित जातीसाठी राखीव आहे. गेल्या दोन टर्मपासून इथे शिवसेनेचे निर्विवाद वर्चस्व टिकून आहे. शिवसेनेचे संजय शिरसाट गेल्या दशकापासून येथील आमदार आहेत. मात्र, यावेळी सेनेला मित्रपक्ष असलेल्या भाजपच्या बंडखोरीचा फटका बसण्याची शक्यता आहे.
औरंगाबाद पश्चिम मतदारसंघात शहरासह अनेक गावांचाही समावेश आहे. यात सातारा परिसर, पंढरपूर, माळीवाडा पासून ते कांचनवाडी, वडगाव कोल्हाटी या गावांसह कामगार वस्ती असलेल्या बजाजनगरचाही समावेश आहे. 2014 च्या निवडणुकीत शिवसेना-भाजप वेगवेगळी लढली होती. त्यावेळी दोघांमध्येच खरी लढत पाहायला मिळाली. यात शिवसेनेने बाजी मारली तर दुसऱ्या क्रमांकावर भाजपचे उमेदवार मधुकर सावंत होते. एमआयएमने देखील माजी मंत्री गंगाधर गाडे यांना या मतदारसंघातून उभे केले होते. मात्र, औरंगाबाद शहरातल्या तीनपैकी या मतदारसंघात एमआयएमला सर्वात कमी मते मिळाली होती.
लोकसभा निवडणुकीत शिवसेनेचे उमेदवार चंद्रकांत खैरे यांना या मतदारसंघातून लीड मिळाली होती. जातीय समीकरणांच्या बाबतीत संमिश्र असा हा मतदारसंघ आहे. त्यामुळेच शिवसेनेसाठी शहरातील तीन मतदारसंघापैकी हा सर्वात सुरक्षित मतदारसंघ आहे. लोकसभा निवडणुकीच्या निकालानंतर वंचित बहुजन आघाडी आणि एमआयएमकडून अनेकजण या मतदारसंघातून आपले नशीब आजमावण्यासाठी इच्छुक आहेत. लोकसभा निवडणुकीत एमआयएमने या मतदारसंघातून अधिक मत मिळावेत म्हणून प्रकाश आंबेडकर आणि ओवैसींची सभा याच मतदारसंघातील मैदानावर घेतली होती. परंतू त्याचा प्रभाव पडू शकला नाही. अनेक जण या मतदारसंघातून निवडणूक लढवण्यासाठी इच्छूक आहेत. भाजपकडून राजू शिंदे, एमआयएम कडून अरुण बोर्डे, काँग्रेसकडून जितेंद्र देहाडे इच्छुक आहेत. गेल्या अनेक दिवसांपासून त्यांनी या मतदारसंघामध्ये कामेही सुरू केली आहेत.
लोकसभा निवडणुकीमध्ये कोणत्या पक्षाला या मतदारसंघातून कसं मतदान झाले
| पक्ष | उमेदवाराचे नाव | मते |
| एमआयएम | इम्तियाज जलील | 71239 |
| शिवसेना | चंद्रकांत खैरे | 77274 |
| अपक्ष | हर्षवर्धन जाधव | 38087 |
| काँग्रेस | सुभाष झाबड | 15595 |
लोकसभेला शिवसेना-भाजपा एकत्र लढली होती. विधानसभा निवडणुकीतही शिवसेना-भाजप एकत्र लढेल अशी अपेक्षा आहे. त्यामुळे इथे शिवसेनेचे पारडे जड राहील असा अंदाज आहे. पण, शिवसेना-भाजप जर एकमेकांच्या विरोधात उभे ठाकले तर मात्र इथे शिवसेना-भाजप विरुद्ध एमआयएम अशी तिहेरी लढत पहायला मिळू शकते.
2014 च्या विधानसभा निवडणुकीमध्ये कोणत्या उमेदवाराला किती मते मिळाली.
| पक्ष | उमेदवाराचे नाव | मते |
| शिवसेना | संजय शिरसाठ | 61 हजार 282 |
| भाजपा | मधुकर सावंत | 54 हजार 355 |
| एमआयएम | गंगाधर गाडे | 35 हजार 348 |
विद्यमान आमदार संजय शिरसाठ यांच्या विरोधात अनेकांनी बंडाच निशाण उगारले आहे. पश्चिम मतदार संघात विकास कामे झाली नसल्याचा दावा इच्छुकांनी केला आहे. त्यात भाजपच्या राजू शिंदेंचे नाव आघाडीवर आहे. युती झाली नाही तर भाजपकडून नाही तर अपक्ष लढणार, असा पवित्रा शिंदे यांनी घेतला आहे. गेल्या तीन वर्षांपासून मतदारसंघात राज्य सरकार कडून निधी आणून कामे केल्याचा दावा राजू शिंदे यांनी केला आहे. तर विद्यमान आमदारांनी मतदारसंघात कामे केली नसल्याचा आरोपसुध्दा ईच्छुक उमेदवारांनी केला आहे. विद्यमान आमदारांनी मात्र इतर उमेदवारांचे आरोप फेटाळून लावलेत. आपल्याला शक्य असलेली सर्व कामे केल्याचा दावा त्यांनी केला आहे. सातारा- देवळाई परिसरात पाण्याचा प्रश्न मार्गी लावण्यास कमी पडल्याचे मात्र संजय शिरसाठ यांनी मान्य केले आहे.
लोकसभेचा निकाल पाहता ईथे शिवसेनेचे पारडे जड मानले जाते. या मतदारसंघात 2014 ची विधानसभा निवडणूक सेना-भाजप विरुद्ध एमआयएम, वंचित आघाडी अशीच पाहायला मिळाली होती. शेवटी काँग्रेसला किती मते मिळतात आणि शिवसेनेला मिळणारी दलित समाजाची मते आपल्याकडे खेचण्यात वंचित-एमआयएमला किती यश मिळते, यावर या मतदारसंघाचा निकाल अवलंबून असेल. बड्या राजकीय उमेदवारांच्या मतविभाजनात नेमके कोण बाजी मारणार याकडे सर्वांचे लक्ष आहे.
