औरंगाबाद - योगेश राठोड या कैद्याचा काही दिवसांपूर्वी हर्सुल कारागृहात संशयास्पद मृत्यू झाला होता. त्यानंतर त्याच्या नातेवाईकांनी कारागृह प्रशासनावर आरोप करत चौकशीची मागणी केली होती. या प्रकरणात आता नवीन तथ्य समोर येत आहे. पॅरोल रजेवर असणारा कैदी जयदीप वगर याने पत्रकार परिषद घेत पोलीस अधिकाऱ्यांवर आरोप केले आहेत. यात त्याने योगेशला अमानुष मारहाण झाल्याचे म्हटले आहे.
१९ जानेवारीला योगेश राठोड या कैद्याचा मृत्यू झाला होता. १८ जानेवारीला न्यायालयाने त्याला पोलीस कोठडी सुनावली होती. त्याच्या अचानक झालेल्या मृत्यूमुळे अनेक प्रश्न निर्माण झाले होते. या प्रकरणात कारागृहातील अनेक कैद्यांचे जबाब नोंदविण्यात आले आहेत. पण, अद्याप कुणावरही कारवाई करण्यात आली नाही. अशातच या कैद्याच्या आरोपांमुळे या प्रकरणात नव्याने वेगळे वळण आले आहे.
जयदीप वगर हा हर्सुल कारागृहातच शिक्षा भोगत आहे. तो सध्या पॅरोलवर आहे. त्याने सांगितले, की वरिष्ठ पोलीस अधिकारी आशीष गोसावी योगेश लाकडी दांड्याने मारहाण करत होते. त्यानंतर त्याला रुग्णालयात हलविण्यात आले. त्यातच त्याचा मृत्यू झाला. मी जबाब नोंदविण्याचा खूप प्रयत्न केला. पण गोसावी यांनी दमदाटी करुन मला जबाब नोंदवू दिला नाही, असा आरोप त्याने केला आहे.
