औरंगाबाद - नवनिर्वाचित खासदार इम्तियाज जलील यांच्या विजयी मिरवणुकीत पाण्याचा अपव्यय झाल्याचे समोर आले आहे. शहरातील जुन्या भागात मिरवणूक काढत असताना एमआयएमच्या कार्यकर्त्यांनी पाण्यात रंग टाकून टँकरमधील पाणी लोकांवर टाकत पाण्याची नासाडी केली. या कृतीमुळे विरोधकांनी जलील यांच्यावर जोरदार टीका केली आहे.
ऐन पावसाळ्यात दुष्काळाची झळ औरंगाबादकरांना बसत आहे. शहराववर टँकरने विकत पाणी घेण्याची वेळ आली आहे. अशामध्ये एमआयएमकडून पाण्याचा मोठ्या प्रमाणात अपव्यय करण्यात आला. याबरोबरच ज्या खासदाराच्या विजयी रॅलीत पाण्याचा अपव्यय करण्यात आला. त्याच खासदाराने लोकसभेत औरंगाबादच्या पाण्याचा प्रश्न उपस्थित केला होता. त्यामुळे खासदार इम्तियाज जलील यांची दुटप्पी भूमिका दिसून येत असल्याचा आरोप शिवसेनेने केला आहे.
औरंगाबाद लोकसभा निवडनुकीमध्ये एमआयएमने राज्यातले आपले खाते उघडले. इमतियाज जलील खासदार म्हणून निवडून आले. या विजयाचा जल्लोष एमआयएम कार्यकर्त्यांनी 2 महिन्यांनी साजरा केला. मात्र, विजय जल्लोष साजरा करताना त्यांनी मोठ्या प्रमाणात पाण्याची नासाडी केली. पाण्याच्या टँकरमध्ये हिरवा, निळा रंग मिसळून ते पाणी मिरवणुकीतील सहभागी झालेल्या लोकांवर टाकण्यात आले.
त्यामुळे आता लोकांना या खासदाराचा खरा चेहरा दिसून येत असल्याचा आरोप माजी खासदार आणि शिवसेना नेते चंद्रकांत खैरे यांनी केला आहे. तसेच विजयी मिरवणुकीत वापरलेले टँकर महानगरपालिकेचे असतील, तर त्याची त्वरित चौकशी करून कारवाई करणार असल्याची माहिती महापौर नंदकुमार घोडेले यांनी व्यक्त केले आहे.
