...म्हणून पुण्यातून उत्तर प्रदेशला मजूर निघाले सायकलवर

पोलिसांनी स्वगृही जाण्याची परवानगी नाकारली, सरपंचांनीही पत्रावर सही देण्यास नकार दिला. टाळेबंदीमुळे जवळचे पैसे संपले. घरमालक घरभाड्याची मागणी करत होते. पण, पैसे नसल्याने त्यांच्या दोन वेळच्या जेवणाचीही भ्रांत झाली होती. त्यामुळे सायकलीने उत्तरप्रदेशच्या दिशेने निघाले आहे.

औरंगाबाद - शहरात आज काही युवक सायकलवर प्रवास करताना दिसले. हे सर्व पुण्यातील आळंदी येथे मोलमजुरी करणारे लोक असून घरी जाण्याच्या परवानगीसाठी अडचण येत असल्याने दोन दिवसांपूर्वी हे सर्वजण सायकलवर निघाले आहेत. सायकलवर आता त्यांना थेट उत्तर प्रदेश गाठायचे आहे.

जळगाव रस्ता सामसूम असताना काही मजूर सायकलवर जाताना दिसले. हे सर्व मजूर उत्तरप्रदेश येथील आजमगड येथील होते. बिगारी कामासाठी पुण्याचा आळंदी येथे एका ठेकेदारकडे काम करत होते. कोरोनाच्या पार्श्वभूमीवर देशात टाळेबंदी करण्यात आले आहे. या काळात काही दिवस जेवणाची सोय झाली. मात्र, काही दिवसांनी जेवणाचे हाल होऊ लागले. घर मालक भाड्यासाठी तगादा लावू लागले आहेत. हाताला काम नाही तर सामान आणण्यासाठी पैसे नाहीत, घरभाडे द्यावे कसे, असा प्रश्न निर्माण झाला. ठेकेदाराने दिलेले पैसे आणि घरातील साहित्य संपल्याने घरी जाण्याशिवाय पर्याय नव्हता.

मात्र, पोलिसांकडे परवानगी मागण्यासाठी गेल्यास त्यांनी दिली नाही. सारपंचकडे सही मागितली त्यांनीही सही दिली नाही. त्यामुळे राहावे कसे असा प्रश्न निर्माण झाल्याने सायकलीवरच घरी जाण्याचा निर्णय घेतला आणि घर रिकामे करुन दोन दिवसांपूर्वी पुणे सोडले असल्याचे मजुरांनी सांगितले. तर सरकार काही उपाय योजना करत असल्याचे सांगत असले तरी प्रत्यक्षात आम्हाला त्याचा लाभ मिळत नसल्याचे त्यांनी सांगितले.

जवळपास 15 जणांनी हजार किलोमीटर पेक्षा अधिकचा हा प्रवास सायकलवर सुरू केला आहे. जायला किती दिवस लागतात माहीत नाही. मात्र, आता घर गाठायचे, असा निर्धार या मजुरांनी केल्याचे काही मजुरांनी सांगितले. अशा मजुरांना सरकार दिलासा कधी आणि कसा देणार, हा प्रश्न निर्माण झाला आहे.

हेही वाचा - औरंगाबादेत 95 वर्षीय महिलेचा कोरोनामुळे मृत्यू, बळींची संख्या 12 वर