Maratha Reservation: मराठवाड्यातील कुणबी दस्तावेज तपासण्याची जबाबदारी मुख्याध्यापकांवर, 48 तासांमध्ये तपशील कळवण्याचे निर्देश

Maratha Reservation : मराठा आरक्षण आंदोलन तीव्र होतंय, असं असताना आता मराठवाडा विभागात कुणबी समाजाचे पुरावे शोधण्यासाठी जिल्हा परिषद मुख्याध्यापकांना कामाला लावण्यात आलंय. 48 तासांमध्ये 1965 आधीच्या शाळेतील जातीच्या नोंदी घेऊन तसा तपशील कळवण्याचे निर्देश देण्यात आलेत. मात्र पन्नास वर्ष जुने पुरावे शोधताना जीर्ण अवस्थेत असलेले ते दस्तावेज खरंच आढळून येतील का? त्यावेळी असलेली उर्दू भाषा मराठी शिक्षकांना समजेल का? असे प्रश्न आहेत.

छत्रपती संभाजीनगर (औरंगाबाद) Maratha Reservation : जालना जिल्ह्यातील अंतरवली येथे मनोज पाटील यांनी आंदोलन सुरू केलंय. ओबीसीमधून आरक्षण देण्याची मागणी त्यांनी केलीय. त्यावेळी मराठवाडा विभागात कुणबी समाज आहे, त्याला आरक्षण मिळू शकतं अशी मागणी होतेयं. त्यामुळे आता या विभागात कुणबी असणाऱ्या नोंदी तपासण्याचे निर्देश राज्य सरकारकडून देण्यात आलेत. हे काम जिल्हा परिषद शाळेतील मुख्याध्यापकांना सोपवण्यात आलंय. बुधवार आणि गुरुवार या दोन दिवसात या सर्व नोंदणीच्या प्रती जिल्हा परिषदकडं देण्याचे निर्देश देण्यात आलेत. त्यानुसार जवळपास एक लाख मुख्याध्यापक कामाला लागले आहेत, अशी माहिती माध्यमिक प्राथमिक शिक्षक संघाचे जिल्हाध्यक्ष आणि मुख्याध्यापक राजेश हिवाळे यांनी दिलीय. (Kunbi documents in Marathwada)

शिक्षण यंत्रणा कामाला : मराठवाड्यातील मराठा समाजाची कुणबी नोंद कुठं-कुठं आणि किती प्रमाणात आहे? याचा तपशील तत्काळ सादर करण्यात यावा, असा आदेश मराठवाड्यातील आठही जिल्ह्यात धडकताच गावागावातील शिक्षण यंत्रणा कामाला लागलीय. त्यांच्या शाळेतील निर्गम उतारावर आणि शाळेच्या दाखल्यावर 'कुणबी' नोंद असणारे दाखले हुडकून काढत ती माहिती तत्काळ गुगल लिंकवर भरून शासनाला पाठवण्यास सुरुवात केलीय. पहिल्या दिवशी मिळालेल्या माहितीनुसार 14,00,000 (चौदा लाख) विद्यार्थ्यांपैकी अंदाजे 38000 (आडतीस हजार) कुणबी असल्याचं समोर आलंय. शासनानं मागवलेली माहिती ही थातूर-मातुर स्वरूपाची किंवा काम कुचराईपणामुळं 'निरंक' गेली. ही बाब पुढे चालून मराठवाड्यातील मराठा समाजाची कुणबी असणारी नोंद या विषयावर न्यायालयात टिकवण्यासाठी जिकरीची राहू शकते, त्यामुळं मेहनत घेऊन लक्षपूर्वक डोळ्यात तेल घालून काम करत असल्याची माहिती जिल्हाध्यक्ष आणि मुख्याध्यापक राजेश हिवाळे यांनी दिलीय.

माहिती घेताना येणार अडचणी : 1965 पूर्वीच्या नोंदी शोधण्याचे निर्देश देण्यात आल्यानं मराठवाडा विभागातील तब्बल एक लाख मुख्याध्यापक कामाला लागले आहेत. मात्र पन्नास वर्षांपूर्वी असलेले दस्तावेज चांगल्या स्थितीत आहेत का? हा प्रश्न उपस्थितीत होत आहे. कागदपत्रांवर वातावरणाचा परिणाम होणं, अनेक दस्तावेज जीर्ण होणं, गहाळ होणं असे प्रकार अनेकवेळा समोर आलेत. अशा परिस्थितीत कुणबी नोंद शोधणं, म्हणजे अवघड समजलं जातंय. त्यात मराठवाडा विभागवार निजामांचं राज्य असल्यानं शिक्षण उर्दू भाषेत मिळत होतं. त्यामुळं बहुतांश ठिकाणी उर्दू भाषेत दस्तावेज आहेत. त्यामुळं मराठी भाषा येणाऱ्या मुख्याध्यापकांना भाषा तज्ञांची मदत घ्यावी लागणार असल्याचं मत मुख्याध्यापक राजेश हिवाळे यांनी व्यक्त केलंय. (Maratha Reservation issue)

महसूल विभाग देखील करत आहे तपासणी : शासनाने महसूल विभागाकडूनसुद्धा अशा काही नोंदी मागावल्या आहेत. ज्यात कोतवाली बुक, जन्म मृत्यू प्रमाणपत्र, खासरा, शेती खरेदी विक्री दास्तावेज, लग्न नोंदणी प्रमाणपत्र ज्यांचे लग्न मराठवाडा-विदर्भ असे झाले असेल याबाबत तपशील, लग्न पत्रिका आणि दोघांचेही शाळा सोडल्याचे दाखले, यासह निजामकालीन किंवा त्या नंतरचा 'कुणबी' नोंद असलेला दस्तावेज ह्या सर्व गोष्टी महसूल विभागाकडे करावी लागणार आहे.


हेही वाचा :