औरंगाबाद - आजोबांच्या निधनाचे दुःख अनावर झाल्याने नातीने गळफास घेऊन आत्महत्या केल्याची घटना औरंगाबाद जिल्ह्यातील पैठण तालुक्यात घडली.
पूजा किशोर वाहुळे असे नातीचे नाव असून, ती हर्षी येथील रहिवासी आहे. सध्या ती गुजरातमधील सुरतमध्ये राहात होती. तसेच संबंधित स्त्री ही २४ वर्षीय विवाहिता होती. आजोबांचे दहा दिवसांपूर्वी निधन झाल्याने दशक्रिया विधीसाठी पूजा माहेरी हर्षी येथे पती व मुलांसह आली होती.
रात्री जेवण झाल्यानंतर सर्वजण झोपी गेले. हवेत गरमी असल्याने सर्व कुटुंबीय बाहेरच झोपले होते. घरात एकट्याच झोपलेल्या पुजाला सकाळी जागे करण्यासाठी गेल्यावर तिने गळफास घेतल्याचे दिसले. या घटनेमुळे वाहुळे परिवारावर दुःखाचा डोंगर कोसळला आहे. पूजाच्या जन्मापासून आजोबांनीच तिचा सांभाळ केला होता. लहानपणापासून आजोबांची लाडकी असल्याने त्यांच्या निधनाने पुजाला खूप दुःख झाले होते. आजोबांच्या निधनाचे दुःख अनावर झाल्याने मानसिक स्थिती बिघडून तिने ही टोकाची भूमिका घेतल्याचा संशय व्यक्त होत आहे.
या घटनेची पाचोड पोलीस ठाण्यात नोंद करण्यात आली असून, मृतदेहाची तपासणी केल्यानंतर त्यावर अंत्यसंस्कार करण्यात आले. पूजाच्या पश्‍चात तिचे पती, दोन लहान मुलगे असा परिवार आहे. तिच्या आकस्मात मृत्यूने हर्षी-खुर्द गावावर शोककळा पसरली आहे.
