औरंगाबाद- जिल्हा बँकेच्या निवडणुकीवरून शिवसेनेतील गटबाजी समोर आली आहे. शिवसेनेचे ज्येष्ठ नेते आणि माजी खासदार चंद्रकांत खैरे यांनी शिवसेनेचेच नेते अंबादास दानवे यांच्यावर टीका केली आहे. 'कोण अंबादास दानवे? तो काय माझ्या पेक्षा वरिष्ठ आहे का? त्याचे नाव घेऊन तोंड खराब करत नाही. जिल्हा मध्यवर्ती बँकेत प्रस्थापितांना जनता कंटाळली आहे. त्यामुळे यावेळी जिल्हा मध्यवर्ती बँक निवडणुकीत चमत्कार होईल आणि शेतकरी सहकार बँक विकास पॅनल निवडून येईल', असे विधान शिवसेना नेते चंद्रकांत खैरे पत्रकार परिषदेत केले आहे.
बागडेंनी आता निवृत्ती घ्यावी-
जिल्हा मध्यवर्ती बँक निवडणुकीसाठी शेतकरी सहकारी बँक विकास पॅनलतर्फे गुरुवारी (१८) पत्रकार परिषद घेण्यात आली. यावेळी शिवसेना नेते चंद्रकांत खैरे यांनी शेतकरी सहकारी बँक विकास पॅनलला जाहीर पाठिंबा दिला आहे. खैरे म्हणाले, आमदार हरिभाऊ बागडे यांना जिल्ह्यातील बँक, संस्था, कारखाने सर्व काही पाहिजे. मात्र हरिभाऊ यांचे आता वय झाले आहे. त्यामुळे त्यांनी आता थांबावे. भारतीय जनता पक्षाच्या नियमानुसार ७० व्या वर्षी निवृत्ती घेण्याचा सल्ला त्यांनी दिला.
तर निवडणुकीची जबाबदारी माझ्याकडे असती-
जिल्हा मध्यवर्ती बँकेची निवडणूक पक्षाच्या चिन्हावर लढवता आली असती तर निवडणुकीची जबाबदारी शिवसेना नेता म्हणून माझ्याकडे असती. गेली ३५ वर्षे काम करतोय, पक्षामध्ये नवीन आले आहेत. त्यांना शिवसेनेची शिस्त, नियमावली देखील माहिती नाही. तर त्यांच्यासाठी मी अनेक बैठका देखील घेणार असल्याचे म्हणत त्यांनी अंबादास दानवे यांच्यावर नाव न घेता निशाणा साधला.
पंचवीस वर्षांपासून बँक तोट्यात- अंबादास मनकापे
अंबादास मनकपे म्हणाले, जिल्हा मध्यवर्ती बँक गेल्या पंचवीस वर्षांपासून तोट्यात आहे. प्रस्थापित शेतकऱ्यांच्या नावावर बँक चालवतात. मात्र शेतकऱ्यांचे प्रश्न आजपर्यंत सुटलेले नाहीत. शासनाच्या योजना आलेल्या असताना त्यांचे पैसे शेतकऱ्यांना मिळत नाहीत. शेतकरी प्रस्थापितांच्या कार्यप्रणालीवर वैतागले आहेत. जिल्हा मध्यवर्ती बँकेत प्रस्थापितांना बँकेचे फायदे तोटे आज देखील काळात नाही. त्यांनी एवढे दिवस बँक चालवली, त्यांनी फायदे तोटे समजून सांगावे. या तुलनेत पश्चिम महाराष्ट्रातील बँका सरस ठरल्या असल्याचेही मनकापे यांनी सांगितले.
