अमरावती - जिल्ह्यातील परतवाडा शहरातील ऑइल मिल मालक अग्रवाल यांच्या घरी ८ दिवसापूर्वी सशस्त्र दरोडा पडला होता. ही घटना ताजी असतानाच, आज परतवाडा अचलपूर शहरातील चावलमंडीत असणार्‍या जाबीर किराणा दुकानाचे संचालकाचे अडीच लाख रुपये लांबवल्याची घटना घडली. याबाबत पोलिसात तक्रार दाखल करण्यात आली आहे.
जाबीर किराणा दुकानाचे संचालक अब्दूल हाफीज अब्दूल राशिद हे आज सकाळी ९ वाजेच्या सुमारास दुकान उघडत होते. त्यांनी आपल्या जवळील अडीच लाख रुपयाच्या रक्कम असलेली पैशांनी भरलेली पिशवी दुकानाच्या शटर जवळ ठेवली. दुकान उघडल्यावर ते पिशवी घेण्यासाठी गेले असता पिशवी तेथे नव्हती. त्यांनी शोधाशोध केली. मात्र, ती पिशवी चोरट्यांनी पळवून नेल्याचा त्यांना संशय आला. तेव्हा त्यांनी अचलपूर पोलीस स्टेशमध्ये धाव घेत तक्रार दाखल केली.
पोलिसांना या घटनेचा तपास सुरू असून त्या परिसरातील सीसीटीव्हीच्या माध्यमातून चोराचा ओळख पटवण्यात येत आहे. गेल्या चार दिवसात अमरावती जिल्हात चोरीच्या घटनांचे प्रमाण वाढले आहे. परतवाडा व अमरावती शहरात दरोडा पडण्याच्या घटना ताज्या असताना पुन्हा चोरट्यांनी डल्ला मारल्याने जिल्हात कायदा व सुव्यवस्थाचा प्रश्न निर्माण झाला आहे.
