अमरावती - राज्य सरकारच्या परवानगीनंतर आता अमरावतीच्या गुरुकुंज मोझरीतील तुकडोजी महाराजांचे प्रार्थना मंदिर व समाधी, ही आज सकाळी सामुदायिक ध्यानानंतर कोरोना काळातील सर्व नियम पाळून खुली करण्यात आली आहेत. विशेष म्हणजे समाधीचे दर्शन सुरू झाल्यानंतर पहिल्या पाच भाविकांचे औक्षण करून त्यांना तुकडोजी महाराजांची ग्रामगीता भेट देऊन त्यांचा सन्मान करण्यात आला.
पहिल्या पाच भाविकांना ग्रामगीता भेट
कोरोनाच्या पार्श्वभूमीवर मागील तब्बल आठ महिन्यापासून राज्यभरातील सर्व छोटी मोठी धार्मिक स्थळे हे बंद होती. त्यामुळेच राज्यातील महत्वाचे धार्मिक स्थळ असलेली तुकडोजी महाराज यांची गुरुकुंज मोझरीतील महासमाधीही बंद होती. आता राज्य सरकारच्या परवानगीनंतर ही समाधीही आज सकाळी सामुदायीक ध्यानानंतर भाविकांना दर्शनासाठी खुली करण्यात आली. यावेळी पहिल्या पाच भविकांना ग्राम गीता भेट देण्यात आली. तत्पूर्वी काल संस्थानच्या वतीने संपूर्ण समाधी परिसर सॅनिटाइज करण्यात आला होता. आजपासून दर्शनासाठी येणाऱ्या प्रत्येक भाविकांना कोरोनाच्या नियमांचे पालन करावे लागणार आहे.
आता होणार समाधीचे जवळून दर्शन
तुकडोजी महाराज यांची समाधी ही खुल्या मैदानात आहे. लॉकडाऊनमध्येही रस्त्यावरून तुकडोजी महाराजांच्या समाधीचे दर्शन भाविक घेत होते. परंतु आता त्यांचे आत जाऊन दर्शन घेता येणार आहे. दरम्यान राष्ट्रसंत तुकडोजी महाराज यांच्या पुण्यतिथी महोत्सवाला दरवर्षी लाखो गुरुदेव भक्त उपस्थिती लावत असतात. परंतु यावर्षी कोरोनाच्या या काळात मंदिरे बंद असल्यामुळे यावर्षी मोजक्याच भक्तांच्या उपस्थितीमध्ये तुकडोजी महाराजांचा पुण्यतिथी महोत्सव पार पडला होता.
हेही वाचा - मुंबई आणि अमरावतीच्या पोलीस आयुक्तांवर कारवाई करा ; अटकेवरून नवनीत राणा आक्रमक
हेही वाचा - अमरावती जिल्ह्यात दिवाळीत गवळणची परंपरा कायम;कोरोनातही नाही पडू दिला खंड
