अमरावती - ती आमच्यापैकीच एक होती. ती आमची बहिणी आमची ताई होती. जीवनयात्रा संपविण्यापूर्वी तिने लिहिलेल्या पत्रात आईबाबत प्रचंड काळजी, चिंता तिने व्यक्त केली. आज तिला जड अंतकरणाने आम्ही श्रद्धांजली वाहत असताना तिच्यामागे आता तिच्या आईचा आधार आम्ही होणार आहोत असा संकल्प करीत रेंजर्स असोसिएशनच्या राज्यभरातील पदाधिकारी आणि सदस्यांनी दीपाली चव्हाण यांच्या आईसाठी मदतनिधी उभारण्याचा निश्चय केला आहे. एकूण 25 लाख रुपयांचे अर्थसहाय्य रेंजर्स असोसिएशनच्यावतीने दीपाली चव्हाण यांच्या आई शकुंतला चव्हाण यांना दिले जाणार आहे.
आईची माफी मागून दीपाली चव्हाण यांनी घेतला जगाचा निरोप
'प्रिय आई सगळ्यात आधी मी घेत असलेल्या निर्णयाबद्दल मी तुझी जितकी माफी मागेल तितकी कमी आहे.' अशा शब्दात दीपाली चव्हाण यांनी आत्महत्त्या करण्यापूर्वी आईच्या नावे पत्र लिहिले होते. या पत्रात मी तुझी काळजी घ्यावी तर तूच माझा आताही सांभाळ करीत आहे. मी घरी येईपर्यंत माझी वाट पाहते. माझ्याशिवाय तू जेवण पण करीत नाही. तुझं दुखणं माझ्यापासून लपवून ठेवतेस. मी नोकरीला लागल्यापासून निदान तुझ्या औषधींचा खर्च तरी भागवणे मला गरजेचे होते. मात्र, ऑफिसच्या खर्चातून मला तुझा औषधींचा खर्चही जमला नाही. तुझा गोळ्या औषधे संपले की आहेत हे पण मी कधी बघितलं नाही. हरिसालला आल्यापासून तुझ्यासाठी मला कामातून वेळ पण काढता आला नाही, असे दुःख दीपाली चव्हाण यांनी जगाचा निरोप घेण्यापूर्वी लिहिलेल्या पत्रात दुःख व्यक्त केले आहे.
हेही वाचा - Anil Deshmukh Resignation LIVE : अनिल देशमुख यांचा गृहमंत्रीपदाचा राजीनामा, नवे गृहमंत्री वळसे-पाटील ?
मदतीसाठी राज्यभरातील वन परिक्षेत्र अधिकारी आलेत एकत्र
दीपाली चव्हाण यांनी त्यांच्या आईबद्दल व्यक्त केलेली चिंता पाहता त्यांच्या आईसाठी राज्यभरातील एकूण 900 वन परिक्षेत्र अधिकारी एकत्र आले आहेत. प्रत्तेकने 5 हजार रुपय्यांची मदत शकुंतला चव्हाण यांना देण्याचा निर्णय घेतला आहे. सुमारे 25 लाख रुपये शकुंतला चव्हाण यांना मदत स्वरूपात दिले जातील, असे रेंजर्स असोसिएशनचे अमरावतीचे कार्याध्यक्ष प्रशांत भुजाडे आणि सचिव कैलाश भुम्बर यांनी ईटीव्ही 'भारत' शी बोलताना सांगितले.
गुजरातमधूनही मदत
दीपाली चव्हाण यांच्यासोबत प्रशिक्षणासाठी गुजरात राज्यातील काही वनपाल होते. दीपाली चव्हाण यांच्या आत्महत्येचे वृत्त देशभरातील वन कर्मचाऱ्यांना चटका लावून गेले. त्यानंतर गुजरातमधील त्यांचे बॅच मेट्स एकत्र आले असून त्यांनीही दीपाली चव्हाण यांच्या आईसाठी आर्थिक मदत जमा करण्याचा निर्णय घेतला असल्याचे महाराष्ट्र रेंजर्स असोसिएशनचे अध्यक्ष कांतेश्वर बोलके यांनी सांगितले आहे.
हेही वाचा - अनिल देशमुखांवर १०० कोटींचा आरोप ते राजीनामा; संपुर्ण घटनाक्रम वाचा एका क्लिकवर
