अमरावती Iron man Awards : समाज व्यवस्थेला लागलेली भ्रष्टाचाराची कीड समुळ नष्ट करून त्यास लगाम घालण्यासाठी राज्यात लाच लुचपत विभाग कार्यरत आहे. याच विभागा अंतर्गत येथील कार्यालयांत कार्यरत असलेले पोलिस कर्मचाऱ्यानी अतिशय कठीण परिश्रम करुन 'आर्यन मॅन ' ही स्पर्धा जिंकून नावलौकिक वाढवले आहे. तर 'आर्यन मॅन'चा पुरस्कार पटकावणाऱ्या पोलिस कर्मचाऱ्याचे राजेश वासुदेव कोचे (Rajesh koche) असे नाव आहे. अलीकडेच गोवा येथील पणजी येथे ही स्पर्धा पार पडली. स्पर्धा जिंकल्या नंतर मानाचा पुरस्कार त्यांना प्रदान करण्यात आला.
राष्ट्रीय तसेच आंतरराष्ट्रीय स्पर्धांमध्ये सहभाग : राजेश कोचे हे अमरावती येथील लाच लुचपत विभागात हेड कॉन्स्टेबल या पदावर कार्यरत आहे. लहानपणापासूनच त्यांना धावण्याची आवड आहे. २००४ मध्ये पोलीस खात्यात रुजु झाल्यानंतर पोलिस खात्याअंतर्गत तसेच इतरही मॅरेथॉन स्पर्धांमध्ये (Marathon) भाग घेतला. पुणे, नाशिक, मुंबई, नागपूरसह, दिल्ली, केरळ, तामिळनाडू आणि हैदराबाद येथे त्यांनी विविध स्पर्धा गाजवल्या. 'नॅशनल रनर' अशी ओळख असलेल्या राजेश यांनी आतापर्यंत राष्ट्रीय तसेच आंतरराष्ट्रीय स्तरावरील फुल मॅरेथॉन, हाफ मॅरेथॉन स्पर्धांमध्ये भाग घेतला आहे. ट्रॅक ओन फील्ड, रोड रनिंग स्पर्धा (क्रॉस कंट्री) मध्ये विद्यापीठाचे ५ कलर कोट मिळाले आहे.
काय आहे 'आर्यन मॅन ' स्पर्धा : सर्व काही शक्य आहे (Any Thing Is Possible) हे घोष वाक्य असलेली 'आर्यन मॅन स्पर्धा' नुकतीच पणजी येथे घेण्यात आली. जागतिक स्तरावरील या स्पर्धेत देश विदेशातील स्पर्धकांनी सहभाग घेतला होता. साडेआड तासांमध्ये दोन किलोमीटर समुद्रात पोहणे, रस्त्यावर ९० किलोमीटर सायकल चालविणे आणि २१ किलोमीटर धावणे हे सर्वच प्रकार स्पर्धकाला दिलेल्या वेळेत पूर्ण करावे लागते, हे आव्हान राजेश यांनी पेलत अवघ्या ७ तास २ मिनिटांत हे आव्हान पूर्ण करून हा बहुमान पटकविला. जागतिक पातळीच्या या स्पर्धेत ५० देशांतून १६०० स्पर्धेकांनी सहभाग नोंदविला होता. जागतिक पातळीवरील नामांकित स्पर्धा म्हणून या स्पर्धेची गणना होते.
यांनी केली मोलाची मदत आणि मार्गदर्शन : सेवानिवृत्त अधिकारी दिलीप पाटील यांनी धावण्यासाठी, जलतरणासाठी मार्गदर्शन केलं. तर हनुमान व्यायाम प्रसारक मंडळाचे लक्ष्मीकांत खंडागळे व प्रवीण आखरे, तर सायकलिंगसाठी डॉ. चंद्रशेखर कुलकर्णी, अतुल कळमकर यांनी मार्गदर्शन केलं. सायकल चालवण्याचा सराव करण्यासाठी माझ्याकडे चांगली सायकल नव्हती. तहसीलदार संतोष काकडे यांना माझी अडचण सांगितली असता, त्यांनी क्षणाचा ही विलंब न लावता सायकल सहजपणे उपलब्ध करून दिली, अशी माहिती कोचे यांनी 'ईटीव्ही भारत' शी बोलताना दिली. प्रा. ठाकरे, प्रा. नीचित, प्रा. गजभिये यांच्यासह माझ्या कुटुंबाचा कायमच भक्कम पाठिंबा असतो.
माझे पुढचे लक्ष्य कॉमरेड मॅरेथॉन : कॉम्रेड्स मॅरेथॉन ही अंदाजे ८८ किलोमीटरची अल्ट्रामॅरेथॉन आहे. जी दक्षिण आफ्रिकेतील क्वाझुलु-नताल प्रांतात दर वर्षी डर्बन आणि पीटरमॅरिट्झबर्ग शहरांदरम्यान चालवली जाते. ही जगातील सर्वात मोठी आणि सर्वात जुनी अल्ट्रामॅरेथॉन शर्यत आहे. जून २०२४ मध्ये ही स्पर्धा नियोजित असून या स्पर्धेत भाग घेणार आहे. यासाठी दररोज ४ ते ५ तास कसून सराव करत असल्याचं त्यांनी सांगितलं. पुढील वर्षी फेब्रुवारीमध्ये नागपूर येथे टायगर मॅन स्पर्धा असून त्यासाठी सुद्धा वेगळी तयारी चालू आहे.
हेही वाचा -
- Sardar Vallabhbhai Patel birth anniversary : सरदार वल्लभभाई पटेल जयंती; जाणून घ्या ते कसे झाले सरदार आणि लोहपुरूष
- National Film Awards Ceremony २०२३ : 'दादासाहेब फाळके पुरस्कार' स्वीकारताना वहिदा रहमान भावूक
- 69th National Film Awards : चित्रपट पुरस्काराच्या विजेत्यांसोबत राष्ट्रपती द्रौपदी मुर्मूंनी दिली फोटोसाठी पोज
